Shyǵys Qazaqstan oblysynda áleýmettik mańyzy bar azyq-túlik taýarlarynyń baǵasyn negizsiz ósirý faktisi anyqtaldy. Bul týraly Saýda jáne tutynýshylardyń quqyqtaryn qorǵaý departamenti habarlady, dep jazady Egemen.kz.
Vedomstvonyń málimetinshe, óńirlik komıssııa elektrondyq shot-faktýralarǵa (EShF) júrgizilgen taldaý barysynda baǵany jasandy túrde kóterý shemasyn áshkerelegen.
Anyqtalǵandaı, jeke kásipker deldaldyq tizbek quryp, taýarlardy ózi baqylaýyndaǵy jaýapkershiligi shekteýli seriktestikke (JShS) qaıta satqan. Iаǵnı qaraqumyq, qant jáne tuz sııaqty áleýmettik mańyzy bar ónimder «óz ishinde» aınalymǵa túsip, baǵa jasandy túrde ósirilgen.
Avıaotyn naryǵynda deldaldar azaıdy
Nátıjesinde halyqqa satylatyn sońǵy baǵa aıtarlyqtaı qymbattaǵan. Máselen, qaraqumyq jarmasyna 127% saýda ústemesi qosylyp, 241 teńgeden alynǵan ónim 550 teńgeden satylǵan. Sondaı-aq qantqa – 45%, as tuzyna 41% ústeme belgilengen.
Zańnamaǵa sáıkes, áleýmettik mańyzy bar taýarlarǵa ruqsat etiletin saýda ústemesi 15%-dan aspaýy tıis.
Atalǵan derek boıynsha quqyq buzýshyǵa qatysty ákimshilik is qozǵalyp, aıyppul salyndy.
Mamandardyń aıtýynsha, negizgi nátıje – tıimsiz deldaldyń saýda tizbeginen shyǵarylýy, bul baǵanyń ádil qalyptasýyna múmkindik beredi.
Abaı oblysynda azyq-túlik baǵasyn negizsiz kótergen kásipkerler jazaǵa tartyldy
Departamenttiń dereginshe, jyl basynan beri óńirde 70-ten astam saýda nysanynyń qujattary taldanyp, nátıjesinde 10-nan astam deldaldyq shema naryqtan joıylǵan. Qadaǵalaý jumystary jalǵasyp jatyr.