Elordada Saılaýdy beıpartııalyq baıqaý ortalyǵynyń baspasóz máslıhaty ótti. Jıynda ortalyq basshysy Qazaqstannyń azamattyq alıansynyń prezıdenti Baný Nurǵazıeva ortalyqtyń qyzmeti týraly, partııalyq emes baqylaýdyń jáne saılaýdy baqylaýdyń jahandyq qaǵıdalary týraly aıtyp berdi.
Baný Nurǵazıevanyń aıtýynsha, álemniń 90-ǵa jýyq elinen kelgen ulttyq saılaý baıqaýshylarynyń jahandyq jelisine 245 múshe uıym qol qoıǵan. Ol qoǵamdyq uıymdar partııalyq emes baqylaýdyń jáne saılaýdy baqylaýdyń jahandyq qaǵıdalary deklarasııasyna adal ekenin eske saldy.
«Qazaqstannyń azamattyq alıansy úkimettik emes uıymdardyń iri birlestigi retinde, ártúrli ÚEU-nyń kúsh-jigerin shoǵyrlandyrýǵa sheshim qabyldady jáne barlyq partııalyq emes baıqaýshylarmen yntymaqtastyqqa daıyn bolatyn biregeı ortalyq qurdy. Ortalyq, saılaý ýchaskelerin barynsha qamtý úshin álemdik standarttarǵa saı baıqaýshylardy daıarlaıdy», deıdi Baný Nurǵazıeva.
Odan bólek Qazaqstan Respýblıkasy kásipodaqtar federasııasy tóraǵasynyń orynbasary Nurlan О́teshev Qazaqstan kásipodaqtary federasııasy baıqaýshylary respýblıkalyq shtabynyń jumysy týraly aıtty.
«Biz buǵan deıin Kásipodaqtar federasııasy baıqaýshylarynyń respýblıkalyq shtabynyń ekinshi otyrysyn ótkizdik, baıqaýshylar sanyn aımaqtar boıynsha naqtylaý, trenıngter ótkizý, olarǵa materıaldar ázirleý sııaqty máselelerdi talqyladyq.
Jıynda belgili bolǵandaı, KKF Respýblıkalyq shtabynyń birinshi otyrysynan bastap shamamen 6 myń baıqaýshynyń 2,5 myńǵa jýyǵy oqytýdan ótken. Sonymen birge Saılaýdy partııalyq emes baıqaý ortalyǵynyń alańynda kúsh biriktirý tıimdiligi sóz boldy.
Belgili qoǵam qaıratkeri Aıgúl Soloveva ony qoldaǵan táýelsiz baıqaýshylar Hartııasynyń jobasy týraly jáne josparlar týraly aıtty.
«Hartııa EQYU qaǵıdattaryna jáne Demokratııalyq saılaý standarttary týraly konvensııaǵa negizdelgen. Jarǵyǵa kez kelgen qoǵamdyq birlestikter men azamattyq belsendiler qosyla alady», dedi ol.
Jıynǵa shaqyrylǵan «Shyǵys-Batys» Halyqaralyq geosaıası boljaý ortalyǵynyń prezıdenti, saıasattaný ǵylymdary doktory, professor Qarlyǵash Nuǵmanova, Dıplomatııa ınstıtýtynyń professory, tarıh ǵylymdarynyń kandıdaty Taısııa Marmontova bul bastamalardy taldap, baǵalady.
Prezıdent janyndaǵy Ulttyq qoǵamdyq senim keńesiniń múshesi, «Alternatıva» zamanaýı zertteýler ortalyǵy» ÚEU dırektory Andreı Chebotarev te táýelsiz baıqaýshylarǵa qatysty pikirimen bólisti.
«Men osyndaı ortalyqtyń qurylýyn jáne osyndaı bastamany quptaımyn. Saılaýdy partııalyq emes baqylaý jónindegi halyqaralyq qujattardy, BUU-nyń qoldaýymen qabyldanǵan saılaýdy beıpartııalyq baıqaýshylardyń qaǵıdattary men etıkalyq kodeksin oqydym. Sondyqtan sizdiń ortalyǵyńyz táýelsiz baqylaý formattarynyń biri bolyp qana qoımaı, halyqaralyq bastamany qolǵa alǵanyńyz qýantady», dedi sarapshy.
Baspasóz konferensııasyna Zoom platformasy arqyly Ortalyqtyń aımaqtyq baıqaýshylary, túrli ÚEU ókilderi jáne BAQ ókilderi qatysty.