Premer-Mınıstr Asqar Mamın Nur-Sultan qalasynda ModeX úı qurylysy kombınatynyń avtomattandyrylǵan konveıerlik jelisiniń resmı ashylýyna qatysty, dep habarlaıdy Egemen.kz
Kásiporynda qurylys merzimin qysqartýǵa, onyń sapasyn arttyrýǵa jáne turǵyn úıdiń ózindik qunyn tómendetýge múmkindik beretin, AQSh, Sıngapýr jáne Germanııada qoldanylatyn iri blokty úı qurylysynyń ınnovasııalyq tehnologııalary engizilgen.
Modýldik bloktar turǵyn úı keshenderin, kottedjderdi, áleýmettik ınfraqurylym obektilerin, onyń ishinde oqý oryndaryn, saýda pavılondaryn, qyzmettik úı-jaılardy jáne t. b. salýda da paıdalanylady.
Iri blokty úı qurylysy klımattyq jaǵdaılarǵa táýeldi emes, óıtkeni jumystyń 80%-y — armatýra baılamynan bastap taza árleýde modýlderdi qalyptastyrýǵa deıin kásiporynda júzege asyrylady, bul barlyq prosesterdi edáýir jyldamdatady. Máselen, bolashaqta 16 qabatty turǵyn úıdi salý úshin tek tórt aı ýaqyt qajet bolady.
Modýlderdi óndirýge qajetti negizgi materıal — keramzıtbeton. Kásiporynnyń temirbeton ónimi "QazQSǴZI" AQ-nyń joǵary beriktigi men uzaq merzimdiligine jasalǵan synaǵynan sátti ótti. Kóp satyly operasııalyq baqylaýdyń jáne avtomattandyrýdyń joǵary deńgeıiniń arqasynda joǵary sapaly ónimge qol jetkiziledi.
BI Group qurylys holdınginiń enshiles kásiporny – úı qurylysy kombınatynyń jobalyq qýattylyǵy jylyna 200 myń sharshy metr turǵyn úıdi quraıdy. 2023 jylǵa deıin jalpy jobalyq qýaty 500 myń sharshy metr turǵyn úıdiń úsh kezegin salý kózdelgen. Kombınat 1 myńnan astam jumys ornyn ashady. Aldaǵy ýaqytta Almaty men Shymkentte iri blokty úı qurylysy zaýyttaryn ashý josparda bar.
"Iri blokty úı qurylysy Qazaqstannyń qurylys salasyn damytýǵa serpin beredi jáne elimizdiń turǵyn úı jáne áleýmettik ınfraqurylymyn salý kólemin keńeıtý jónindegi mindetterdi sheshýge yqpal etedi", dedi A. Mamın.
Is-sharaǵa Premer-Mınıstrdiń orynbasary R.Sklıar, Nur-Sultan qalasynyń ákimi A.Kólginov, Indýstrııa jáne ınfraqurylymdyq damý mınıstri B. Atamqulov, Bilim jáne ǵylym mınıstri A.Aımaǵambetov qatysty.