Qazaqstan Halyq partııasy músheleriniń jurtshylyqpen kezdesýi elimizdiń barlyq óńirinde jalǵasýda. Atalǵan kezdesýler aıasynda partııanyń maqsat-muraty tanystyrylyp, negizgi baǵyttary túsindirilýde. Máselen, keshe partııa músheleri Kókshetaý jáne Taldyqorǵan qalalarynyń turǵyndarymen júzdesti.
Partııa tóraǵasy, Májilis depýtaty Aıqyn Qońyrov pen atalǵan partııanyń atynan Parlament Májilisiniń depýtattyǵyna kandıdat Oljas Syzdyqov Kókshetaýdaǵy Aqmola oblystyq aýrýhanasynyń medısına qyzmetkerlerimen kezdesý ótkizdi. Onda partııa baǵdarlamasynyń tezısteri túsindirildi. Kezdesýde aýrýhanany tehnıkalyq jabdyqtaý, medısına qyzmetkerleriniń jumys kestesi, qyzmetkerlerdiń jalaqysy, biliktilik talaptary, dárigerler úshin áleýmettik kepildikterdi arttyrý máseleleri kóterildi. QHP otandyq medısına deńgeıin, halyqqa qyzmet kórsetý sapasyn arttyrý jáne osy salada jumys isteıtin qyzmetkerlerdiń mártebesin ósirý úshin qajetti sharalardyń bárin qabyldap, qoldanýǵa nıetti.
Sondaı-aq Taldyqorǵandaǵy «Rýhanı jańǵyrý» ǵımaratynda atalǵan partııanyń ókili, Májilis depýtaty Irına Smırnova, osy partııanyń atynan Parlament Májilisiniń depýtattyǵyna kandıdat Erlan Smaılov, QHP Almaty oblystyq fılıalynyń birinshi hatshysy Sáýle Bıǵarova óńir turǵyndarymen kezdesý ótkizdi. Kezdesýde partııanyń, onyń depýtattyq fraksııasynyń jumysy týraly aqparat berildi.
Dittegen maqsatqa jetý úshin partııa qoıǵan mindetterdiń ereksheligi saılaýshylardyń nazaryn aýdaryp qana qoımaı, elektorattyń shynaıy qyzyǵýshylyǵyn oıatty.
Qazaqstan áleýmettik baǵdarlanǵan memleketke aınalýǵa tıis, dep esepteıdi QHP kandıdattary. Sondyqtan medısına men bilimniń qoljetimdiligi men sapasy qalypty normaǵa aınalýy tıis.