Qazaqstan Respýblıkasy Táýelsizdiginiń 29 jyldyǵyna oraı, elordalyq mádenıet oshaqtary kórmeler men konsertter, qoıylymdar, premeralar jáne synyp saǵattaryn usynady，dep habarlaıdy Egemen.kz
Is-sharalardy úıden shyqpaı-aq onlaın rejımde tamashalaýǵa bolady, dep habarlaıdy QazAqparat Nur-Sultan qalasy mádenıet basqarmasynyń baspasóz qyzmetine silteme jasap.
Táýelsizdik saraıynyń birinshi qabatynda jeltoqsan boıy merekege oraı «Táýelsizdiktiń belgisi – Nur-Sultan» kórmesi ashyldy.
Ekspozısııany Instagram-daǵy @tauelsizdik_sarayi paraqshasynan da tamashalaýǵa bolady.
14-16 jeltoqsan aralyǵynda Nur-Sultan qalasy ákimdiginiń jańa Jastar mýzykalyq teatry qala turǵyndary men qonaqtaryn M.Áýezovtiń «Abaı-Toǵjan» mýzykalyq dramasynyń premerasyna shaqyrady.
Merekege oraı Nur-Sultan qalalyq Memlekettik akademııalyq fılarmonııasy qala turǵyndaryn «Táýelsizdik – tuǵyrym» onlaın konsertine shaqyrady.
Facebook, Instagram paraqshalarynda jáne fılarmonııanyń YouTube-arnasynda translıasııa júrgiziledi.
Tarıhı-mádenı mura eskertkishteri men nysandarynyń saqtalýyn qamtamasyz etý jónindegi dıreksııa Saltanat qaqpasynda qazirgi zamanǵy beıneleý óneriniń kórmesin jáne «Táýelsizdik – máńgilik el muraty» taqyryptyq ekspozısııasyn uıymdastyrady.
15-17 jeltoqsan aralyǵynda saıası qýǵyn-súrgin jáne totalıtarızm qurbandarynyń «ALJIR» memorıaldy-murajaı kesheni óziniń YouTube kanalynda jáne resmı akkaýnttarynda «Táýelsizdik tuǵyry bıikte» atty onlaın kórmesin usynady.
Sáken Seıfýllın murajaıy da el Táýelsizdiginiń 29 jyldyǵyna oraı merekelik is-sharalar daıyndady.
15 jeltoqsanda Seifullin_museum paraqshasynda «Táýelsizdiktiń altyn arqaýy – ana tilim» chellendji uıymdastyrylady, oqýshylar mánerlep óleń oqıdy.
Kúndiz murajaı ujymy «Táýelsizdik – uly baqyt» atty onlaın kórme ótkizedi.
Oqyrmandarynyń oı-órisin keńeıtý úshin kóptegen tanymdyq oıyndar, tarıh saǵattary men sabaqtaryn kitaphana júıesi uıymdastyrady.
Barlyq is-sharalar onlaın rejımde qalalyq kitaphanalardyń áleýmettik jelilerdegi paraqshalarynda ótedi.
Mereke kúnderi elordalyqtar men qala qonaqtaryna qalalyq teatrlar qoıylym qoıady.
15 jeltoqsan kúni saǵat 19:00-de Jastar teatrynyń ártisteri kórermenderge «Nartáýekel» dramalyq poemasynyń qoıylymyn usynady. «NAZ» memlekettik bı teatry «Tuıǵyndar» horeografııalyq spektaklin usynady.
15 jáne 16 jeltoqsan kúnderi saǵat 19:00-de Nur-Sultan qalasy ákimdiginiń «Nomad City Hall» qonaqtaryn «Jas Abaı» spektakliniń premerasyna shaqyrady.
M. Gorkıı atyndaǵy Memlekettik akademııalyq orys drama teatry kórermender úshin 15 jeltoqsan kúni keshke N. Gogoldiń «Jenıtba» komedııasyn usynady.
Kelesi kúni onlaın formatta Sáken Seıfýllın, Beıimbet Maılın jáne Ilııas Jansúgirovtyń «Krylataıa ıspoved volnyh serdes» shyǵarmalary boıynsha teatr ujymy mýzykalyq-poetıkalyq kompozısııasyn sahnalaıdy.
16 jeltoqsan kúni saǵat 12:00, 14:00 jáne 16:00-de qýyrshaq teatry «Atameken« patrıottyq qoıylymyn usynady.
Osy kúni sırk qoıylymy men elordalyq sırk uıymdastyrǵan derekti baǵdarlamany myna paraqshadan kórýge bolady.
Al áleýmettik jelilerde Jastar saraıynyń «Jiger» estradalyq-djaz ansambliniń mýzykalyq quttyqtaýy ótedi.
Aıta keteıik, barlyq is-sharalar sanıtarlyq talaptarǵa saı ótkiziledi.