Fýtboldan Qazaqstan quramasyn qazaqstandyq tanymal maman Talǵat Baısýfınov jattyqtyratyn boldy. Bul týraly Qazaqstan fýtbol federasııasynyń baspasóz qyzmeti habarlady.
52 jastaǵy Talǵat Marýauly – Pavlodar fýtbol mektebiniń túlegi. Sporttyq karerasynda ol KSRO jáne Qazaqstan klýbtarynda dop teýip, 2003 jyly bapkerlik qyzmetin bastady. Sóıtip ár jyldary Petropavldyń «Esil-Bogatyr», Pavlodardyń «Aqsý», «Ertis», Oraldyń «Aqjaıyq» fýtbol klýbtarynda jumys istedi. 2010 jyly «Ertis» klýbymen Qazaqstan chempıonatynyń qola, 2012 jyly kúmis júldegeri atandy. Sondaı-aq 2015 jyly «Aqjaıyq» komandasymen Birinshi lıganyń bas júldesin jeńip alǵan.
Talǵat Baısýfınov buǵan deıin de, ıaǵnı 2016-2017 jyldary ulttyq quramany basqaryp, 2018 jylǵy álem chempıonatynyń irikteý kezeńine qatysqan bolatyn. Osy ýaqyt aralyǵynda ol 8 oıyn ótkizip, eki ret jeńiske jetip, 3 márte teń túsken. Úsh match jeńilispen aıaqtalǵan. Baısýfınov ulttyq quramany basqarǵan kezde Qazaqstan FIFA reıtınginde 83-orynǵa deıin kóterilgen bolatyn. Kelesi kóktemde Qazaqstan quramasy 2022 jylǵy álem chempıonatynyń irikteý týrnırin bastaıdy.