16-18 jeltoqsany aralyǵynda Bosnııa jáne Gersegovınada QR Táýelsizdigi kúnine arnalǵan is-sharalar ótti, dep habarlaıdy Egemen.kz SIM silteme jasap.
Belgili bosnııalyq músinshi, Bosnııa men Gersegovına Joǵary qoldanbaly óner mektebiniń professory Stıepo Gavrıch jasaǵan qazaqtyń uly aqyny jáne oıshyly Abaıdyń bıýsti «Saraevo eski qalasy» tarıhı aýdanynda ornatyldy.
Eskertkish Melıaska ózeniniń jaǵasynda, sáýlet óneriniń shedevrleriniń ortasynda – 1891 jylǵy merııa, XVI ǵasyrdaǵy Hadjııa meshiti, Ulttyq kitaphana jáne Bosnııa astanasynyń basqa da kórikti jerleriniń qasynda ornalasqan.
Saraevodaǵy mádenı aksııa aıasynda, Abaıdyń tańdamaly shyǵarmalar jınaǵynyń, sondaı-aq Jaqypbek Altaevtyń «Ál-Farabı - Shyǵystan shyqqan uly oıshyl» kitabynyń tusaýkeseri alǵash ret QR Qurmetti konsýldyǵy men «Búrkit» iskerlik yntymaqtastyq Qaýymdastyǵynyń kómegimen bosnııa tiline aýdarylyp basyldy.
«Saraevo eski qalasy» mýnısıpalıtetiniń meri Ibragım Hadjıbaırıchpen kezdesý barysynda Qazaqstan Elshisi Tólejan Barlybaev qala bıligine onyń týǵanyna 175 jyl tolýyna oraı Abaı bıýstiniń ornatylýyna yqpal etkeni úshin zor rızashylyǵyn bildirip, qazaq aqyny men oıshylynyń álemdik rýhanı jáne mádenı muraǵa qosqan zor úlesin atap ótti.
Saraevo eski qalasynda 2021 jyly Qazaq mádenı ortalyǵyn ashý týraly ýaǵdalastyqqa qol jetkizildi. Dıplomat sonymen qatar Saraevoda Abaı eskertkishin ornatý ıdeıasyn júzege asyrǵany jáne onyń tańdamaly shyǵarmalarynyń jınaǵyn shyǵarǵany úshin Bosnııa men Gersegovınadaǵy QR Qurmetti konsýly Amel Dızdarevıchke jáne «Berkýt» Bosnııa iskerlik yntymaqtastyq qaýymdastyǵynyń belsendilerine erekshe alǵysyn bildirdi.