«Egemen Qazaqstan» gazetiniń Atyraý oblysyndaǵy menshikti tilshisi qyzmetin uzaq jyl atqarǵan qalamgerdiń biri – Qazaqstannyń Qurmetti jýrnalısi Qazıhan Qabdel. Jaqynda bas basylymda on bes jylǵa jýyq jumys istegen tanymal qalamger turǵan úıge eskertkish taqta ornatyldy, dep habarlaıdy Egemen.kz
Qalamy júırik jýrnalıst Qazıhan Qabdeldiń qalamgerlik, qaıratkerlik qyry el gazetinde jarqyraı kórindi. «Egemenniń» tilshisi bolǵan 1986-2000 jyldary óńirdiń áleýmettik-ekonomıkalyq problemasyn jete zerttep, oqyrmandy eleń etkizetin tushymdy maqalalar jazdy. Ár saladaǵy jylt etken jańalyqty jedel jetkizip otyrdy. Ásirese feleton janryna kóbirek qalam terbep, bıýdjet qarjysyn, qoǵam múlkin talan-tarajǵa salýshylardy syn sadaǵyna ildi.
«Qazıhan Qabdel – eshkimge búıregi bura tartpaıtyn, ádildikti jaqtaıtyn qalamger. Eshkimniń ala jibin attamady. Onymen oblystyq «Atyraý» gazetinde de, oblystyq partııa komıtetinde de áriptes boldyq. Keıin oblystyq fılarmonııany basqarýǵa jiberildi. Bul laýazymdy minsiz atqaryp, gazet redaksııasyna qaıta oraldy. «Egemenniń» menshikti tilshisi bolyp, óńirdiń qordalanǵan máselelerine Úkimet basshylarynyń nazaryn aýdarǵan maqalalar jazdy. Ol kóziniń tirisinde qalamyn qolynan tastamady. Kómek surap kelgen oqyrmannyń muńyn muńdady, joǵyn joqtady. Beınelep aıtqanda, jýrnalıstik kásibine adaldyǵynan aınyǵan joq» dep eske aldy áriptesi, Qazaqstannyń Qurmetti jýrnalısi Aıtqalı Nurǵalıev.
Bas basylymnan zeınetkerlikke shyqqan Qazıhan Qabdel 2011 jyly ómirden ozǵan edi.