Prezıdent Qasym-Jomart Toqaevqa Premer-Mınıstr Asqar Mamın elimizdiń sanıtarlyq-epıdemıologııalyq ahýaly men áleýmettik-ekonomıkalyq damýynyń ózekti máseleleri jaıynda esep berdi.
Úkimet basshysy respýblıkadaǵy sanıtarlyq-epıdemıologııalyq ahýal baqylaýda ekenin, kúndelikti jańadan indetke shaldyqqandardyń sany 0,4 paıyzǵa ósip otyrǵanyn, elimiz boıynsha koronavırýstyń órshý deńgeıiniń kórsetkishi 0,9 paıyzdy quraıtynyn aıtty. Juqpaly aýrýlar aýrýhanalarynyń 28 paıyzynda, jansaqtaý bólimderiniń 20 paıyzynda adamdar emdelip jatyr. Qazirgi ýaqytta COVID-19 indetiniń taralý qarqyny boıynsha Atyraý oblysy «qyzyl aımaqta», Qostanaı, Aqmola, Pavlodar jáne Soltústik Qazaqstan oblystary «sary aımaqta», qalǵan óńirlerdiń barlyǵy «jasyl aımaqta» tur.
Bıylǵy 19 jeltoqsanda otandyq QazCovid-in vaksınasyn klınıkalyq synaqtan ótkizýdiń sońǵy III satysy bastaldy. Onyń sheńberinde 3 myń erikti azamatqa ekpe egilýde. 2021 jyly naýryz aıynda Jambyl oblysy Qordaı aýdanynda jylyna qýaty 60 mıllıon mólsherde vaksına shyǵarýǵa jetetin bıofarmasevtıkalyq zaýyt paıdalanýǵa beriledi.
Sonymen birge Qaraǵandy qalasynda reseılik «Spýtnık V» vaksınasyn shyǵarý óndirisin iske qosýǵa daıyndyq jumystary júrip jatyr. Memleket basshysyna ınvestısııa tartý, óńirlerdi damytý jobalaryn júzege asyrý, halyqty jumyspen qamtý jáne elimizdiń áleýmettik-ekonomıkalyq damýynyń ózge de ózekti máseleleri jóninde baıandaldy.