Almaty qalasynda opa-dalap qoımasyna qaraqshylyq shabýyl jasaǵan tórteý ustaldy, dep habarlaıdy Egemen.kz Polisia.kz portalyna silteme jasap.
Qaraqshylar «Aqjar» shaǵyn aýdanynda ornalasqan opa-dalap qoımasyna shabýyldy túngi on birde jasaǵan.
«Qaraqshylar ózderin kúzet kompanııasynan kelgen tekserýshiler retinde tanystyryp, aldaý jolymen ishke kirgen. Kúzetshi qýlyqty sezbeı esikti ashqanda qaskúnemder ony shalqasynan túsirgen. Kúdiktiler birden ishinde segiz mıllıon teńgesi bar seıfke bettegen. Olar ǵımarattyń esigin ashyp, aqshadan basqa dekoratıvti kosmetıka salynǵan birneshe qorapty alyp ketken. Kúzetshi kúdiktiler oqıǵa ornynan ketip qalǵannan keıin dabyl soqqan», dedi Naýryzbaı aýdandyq Polısııa basqarmasynyń bastyǵy Dıdar Ahanov.
Atalǵan fakt Sotqa deıingi tergep-tekserýlerdiń biryńǵaı tiziliminde QR QK-niń 192-babynyń 4-bóligi (Qaraqshylyq) boıynsha tirkeldi.
Arnaıy tergeý-jedel toby quryldy. Keshendi sharalar nátıjesinde kúdiktiler anyqtalyp, qamaýǵa alyndy. Olardyń úsheýi Almaty oblysynyń, al bireýi Shyǵys Qazaqstan oblysynyń turǵyny bolyp tabylady. Toptyń eń úlken múshesi 32 jasta, eń kishisi 20 jasta. Buryn olardyń eshqaısysy qylmystyq jaýapkershilikke tartylmaǵan. Polıseılerdiń habarlaýynsha, kúdiktilerdi ustaý sharasyn PD-niń arnaıy bólimshesiniń qyzmetkerleri júrgizgen. Qaskúnemderdiń kóligi qalaǵa kire beriste buǵattalǵan.
«Kúdiktiler urlanǵan seıfti qylmystan keıin birden senimdi jerge jasyrǵan, olar ony alyp ketýge eki kúnnen keıin kelýge kelisken. Oǵan deıin biz kezdesý ýaqyty men orny týraly bildik. Aıtpaqshy, ustalǵandardyń biri osy kompanııada ekspedıtor bolyp jumys isteıdi, ol dál osy nysanǵa dostaryn kompanııanyń kirisi týraly bilgennen keıin alyp kelgen. Sondyqtan olarǵa kúzetshini aldaý qıynǵa soqpaǵan», deıdi ol.
Ustalǵandar qazir qamaýda. Zattaı aıǵaqtar tárkilendi. Tergeý jalǵasyp jatyr.