Búgin Brazılııada fýtboldan 20-shy álem chempıonatynyń jerebesin tartý ótkiziledi. Bul týraly ITAR-TASS habarlady.
«Álemdik dodaǵa qatysatyn 32 quramany segiz topqa bólip shyǵarý jahandyq jarystyń sheshýshi sáti bolmaǵanymen, mańyzdy prosess bolyp tabylady. 2014 jylǵy 14 maýsymda San-Paýlýda sóreden shyǵatyn týrnırge qatysýshylardyń budan arǵy taǵdyry kóp jaǵdaıda osyndaǵy qarsylastaryna baılanysty bolmaq», – dep jazady agenttik osyǵan oraı.
Halyqaralyq fýtbol federasııasy (FIFA) osy jerebege deıin 32 komandany tórt kárzeńkege bólip qoıdy. FIFA-nyń bıylǵy qazan aıyndaǵy reıtıng-paraǵyna sáıkes, birinshi kárzeńkege eń úzdik jeti komanda, sondaı-aq alań ıesi – Brazılııa quramasy tústi. Al qalǵan kárzeńkeler is júzinde qatysýshy komandalardyń geografııalyq prısıpterine qaraı toltyryldy.
Sonymen, birinshi kárzeńkege Brazılııa, Ispanııa, Germanııa, Argentına, Kolýmbııa, Belgııa, Ýrýgvaı, Shveısarııa salyndy. Ekinshi kárzeńke bir topta bir qurlyqtyń eki birdeı komandasy bolmaýy kerek degen qaǵıdatpen Afrıka jáne Ońtústik Amerıka quramalarynan quraldy. Biraq bulardyń sany 7 ǵana bolǵandyqtan, 8-shi komandany Eýropadan alýǵa uıǵarym jasaldy. Sebebi, kári qurlyqtyń 12 komandasy tolyq eki kárzeńkeni toltyrǵanymen, 13-shisi oǵan syımaı qalatyn. Sondyqtan uıymdastyrýshylar muny qazan aıynda eń tómengi kórsetkishti Fransııaǵa bermek bolǵan. Biraq FIFA sosyn munyń budan da kúrdeli túıinin oılap tapty. Ol jerebe salý kezinde Eýropanyń shary eń sońynda qalǵan quramasyn osy toptyń bólinisine qoıýǵa sheshim etti. Sóıtip, ekinshi kárzeńkege Aljır, Gana, Kamerýn, Kot-d`Ivýar, Nıgerııa, Chılı jáne Ekvador tústi. Úshinshi kárzeńke Soltústik Amerıka jáne Azııa qurlyǵynyń komandalarymen toptasty. Olardyń arasynda Gondýras, Kosta-Rıka, Meksıka, AQSh, Avstralııa, Iran, Ońtústik Koreıa jáne Japonııa quramalary bar. Al tórtinshi kárzeńkege Eýropanyń birinshi kárzeńkege kirmeı qalǵan 9 quramasy jınaldy. Joǵaryda aıtylǵandaı, ekinshi kárzeńkedegi 7 komandanyń qataryn osyndaǵy bir «artyq» ujym jerebe salý kezinde tolyqtyrady. Mundaǵylar Anglııa, Bosnııa jáne Gersogovına, Grekııa, Italııa, Gollandııa, Portýgalııa, Reseı, Fransııa jáne Horvatııa quramalary bolyp otyr.
Jerebe tartý kezinde berlyq segiz toptyń quramy anyqtalyp bolǵannan keıin, ekinshi-tórtinshi kárzeńkelerdegi qatysýshylardyń rettik sandaryn anyqtaý maqsatynda taǵy bir jerebe ótkiziledi. Tek osydan keıin ǵana týrnırdiń ázirge sıfrlyq varıant boıynsha jasap qoıylǵan toptyq kestesi komandalardyń attarymen birge jarııa bolady.
Aıdar О́risbaev.
Derekkóz: Itar-tass.com