Búgin QR Úkimetiniń otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev 2020 jyldyń vegetasııalyq kezeńiniń qorytyndylary týraly baıandama jasady. Onyń sózinshe, bıyl briqatar óńirde qıyndyq týǵanymen, sýarý maýsymy sátti aıaqtalǵan.
«Sońǵy úsh jylda Qazaqstan sý az sıkline kirdi. 2019 jyly ózen aǵysynyń jalpy kólemi 83 km3-di qurady. Bul ortasha kóp jyldyq kórsetkishten 20%-ǵa az. Aıta ketý kerek, respýblıka boıynsha paıdalanylatyn sýdyń 97%-y ońtústiktegi tórt oblysqa tıesili. Respýblıka boıynsha paıdalanylǵan sýdyń naqty kólemi 13,3 km3 –di qurady. Bul 2019 jylmen salystyrǵanda 1 km3-ge artyq. Bıylǵy vegetasııalyq kezeń turaqty ótti. Degenmen de óte shıelenisti boldy», - dedi Maǵzum Myrzaǵalıev Úkimet otyrysynda. Aıta keteıik, Memleket Basshysy Qasym-Jomart Toqaev 2030 jylǵa deıin sýarmaly jer kólemin úsh mıllıon gektarǵa deıin jetkizýdi tapsyrǵan. «Bizdiń esepteýlerimizge sáıkes, sý tutynýdyń aǵymdaǵy úrdisi 1,5 mln.ga-ǵa 13,3 km3 kóleminde saqtalsa, boljamdy tapshylyq 2030 jylǵa qaraı 11,7 km3-ty quraýy múmkin.Osyǵan baılanysty, qazirdiń ózinde sý tutynýdy qysqartý boıynsha sharalardy júzege asyrý qajet», - dep naqty sharalar usyndy Maǵzum Myrzaǵalıev. Sonymen, birinshiden, sý tapshylyǵyn boldyrmaý maqsatynda kúrish egisin 29 myń gektarǵa azaıtý qajet. (Qyzylorda - 15 myń ga, Almaty 10 myń ga, Túrkistan 4 myń ga) Bul bir kýb kılometr sýdy únemdeýge múmkindik bermek. Ekinshiden, keminde 750 myń gektar alańda sýarýdyń sý únemdeýshi tehnologııalaryn engizýdi jalǵastyrý kerek. Bul ortasha alǵanda 30%-ǵa deıin sýdy únemdeýge septigin tıgizedi. Úshinshiden, 6 myń shaqyrym sýarý jelilerin qaıta jańartý jáne 119 negizgi magıstraldyq kanaldarda sıfrlandyrýdy jappaı engizý esebinen jylyna 2 km3 sý únemdeledi. Atalǵan qajettilikterge 5 jylda respýblıkalyq bıýdjetten jáne halyqaralyq qarjy uıymdarynan 192 mlrd.teńge jumsalady. Tórtinshiden, 10 jylda 3,6 km3 kóleminde sý jınaqtaý úshin 39 jańa sý qoımasy salynady. 394 myń gektar jańa sýarmaly jer sý kózimen qamtamasyz etiledi.«Joǵaryda atalǵan is-sharalardy sátti iske asyrǵan jaǵdaıda shamamen segiz bútin onnan segiz 8,8 km3 sýdy qosymsha shoǵyrlandyrýǵa múmkindik paıda bolady. Sonymen, ylǵal súıgish daqyldardyń, ıaǵnı kúrish pen maqta egistik alqaptaryn kezeń-kezeńimen azaıtý qajet. Jańa sý qoımalaryn salý jáne kanaldardyń tehnıkalyq jaı-kúıin jaqsartý jónindegi jobalar jalǵastyrylatyn bolady. Sýarýdyń sý únemdeý tehnologııalaryn engizbesten sýarmaly jerlerdiń aýdanyn ulǵaıtý múmkin emes. Sýarmaly sýdy utymdy jáne únemdi paıdalaný maqsatynda 2025 jylǵa deıin 119 negizgi kanaldarda jappaı sıfrlandyrýdy júrgizý qajet. Ońtústik óńirlerdegi transshekaralyq kózderge táýeldilikti nazarǵa ala otyryp, jańa sýarmaly jerler sýmen qamtamasyz etilgen shyǵys jáne soltústik óńirlerde engizilýge tıis», - dep túıdi sózin mınıstr.