Keńes Odaǵynyń batyry Núrken Ábdirov atyndaǵy Qaraǵandy avıasııalyq bazasyna jańa kóp maqsatty Sý-30SM ushaqtar býyny ákelindi. Reseı Federasııasynan ushaqtardy «Irkýt» avıasııalyq zaýytynyń tájirıbeli synaýshy ushqyshtary ushyryp ákeldi, dep habarlaıdy Egemen.kz.
Sý-30SM – «4++» jańa býynynyń joıǵyshy. Ol kez kelgen aýa raıynda kúndiz de, túnde de áreket etýge, qarsylastyń ushaqtaryn atyp túsirip qana qoımaı, jerústi nysanalaryn da joıýǵa, áýede barlaý júrgizýge jáne basqa ushaqtarǵa nysana kórsetýge qabiletti. Sý-30SM ushaǵy uzaqqa usha alady jáne oǵan otyndy áýede toltyryp quıý múmkindigi bar. Qazirgi kezde bul álemdegi eń úzdik kópfýnksıonaldy áskerı joıǵyshtardyń biri.
Avıasııalyq bazada ushaqtardy Qorǵanys mınıstri general-leıtenant Nurlan Ermekbaev, QR QK ÁQK bas qolbasshysy avıasııa general-leıtenanty Nurlan Ormanbetov, Qaraǵandy oblysynyń ákimi Jeńis Qasymbek qarsy aldy.
Qorǵanys mınıstri general-leıtenant Nurlan Ermekbaev jańa avıasııalyq tehnıkanyń Áskerı-áýe kúshterine Qazaqstan Qarýly Kúshterin qaıta jaraqtandyrý josparyna sáıkes jetkizilgenine toqtalyp ótti.
Ol joǵary manevrli kóp maqsatty Sý-30SM joıǵyshtary áskerlerdi jáne obektilerdi áýeden shabýyldaý quraldarynan búrkemeleý, áýedegi jáne jerústi nysanalaryn anyqtaý jáne joıý múmkindigin aıtarlyqtaı arttyratynyn, onyń nátıjesinde Qarýly Kúshterdiń jaýyngerlik áleýeti kúsheıetinin sóz etti.