Qazirgi kezde Jambyl oblysynda medısına salasy mamandarynyń jetispeýshiligi baıqalyp otyr. Bul óńir úshin de, aýyldyq jerler úshin de mańyzdy.
Osy oraıda, búgin Jambyl oblysynyń ákimi Berdibek Saparbaev pen S.Asfendııarov atyndaǵy Qazaq ulttyq medısına ýnıversıtetiniń rektory Talǵat Nurǵojınniń qatysýymen Taraz qalasyndaǵy Jambyl joǵary medısınalyq kolledjiniń bazasynda atalǵan ýnıversıtettiń fılıaly ashyldy.
Jambyl joǵary medısınalyq kolledjinińdırektory Jámıla Sarybekova qonaqtarǵa pándik kabınetterdi aralatyp, telestýdııa, murajaı, kitaphana jáne elektrondyq qyzmetterdi usynýǵa arnalǵan ǵımarattardy tanystyrdy. Bul rette Berdibek Saparbaev múgedektigi bar stýdentterdiń bilim alýyna jasalǵan jaǵdaımen tanysyp, ınklıýzıvti bilim berýdi damytý men túlekterdiń jumysqa ornalasý múmkindigine kóńil bóldi. Al, atalǵan fılıalda bastapqy kezde shamamen 100 adam oqýdy bastaǵan. Sondaı-aq, rezıdentterdi belsendi túrde tartý kózdelgen. О́z sózinde Jámıla Sarybekova kolledjde ınklıýzıvti top qurylǵanyn, túlekterdi jumysqa ornalastyrý úshin oblystaǵy 41 densaýlyq saqtaý mekemesimen yntymaqtastyq týraly kelisimsharttar jasalǵanyn atap ótti. Kolledj ujymymen kezdesken Berdibek Saparbaev pandemııa jaǵdaıynda densaýlyq saqtaý salasyn memlekettik qoldaý aıtarlyqtaı artqanyn jetkizdi. «Pandemııabizdiń burynnan kele jatqan máselelerimizdi, birinshi kezekte saladaǵy kadrlardyń tapshylyǵyn kórsetip berdi. Búgingi kúni shamamen 250 bos jumys orny bar. Másele júıeli túrde sheshilýi kerek. Osyny eskerip biz qyrkúıek aıynda S.Asfendııarov atyndaǵy Qazaq ulttyq medısınalyq ýnıversıtetimen yntymaqtastyq ornatyp, tıisti memorandým jasadyq. Joǵary oqý ornynyń tájirıbeli dárigerleri shalǵaı aýdandardaǵy jergilikti medısınalyq qyzmetkerlerge kómektesip, tájirıbelerimen bólisedi. Bul tájirıbeli dárigerlermen, professorlarmen qoıan-qoltyq jumys istep, tájirıbesin meńgerýge, ǵylymdy damytýǵa tamasha múmkindik», dedi ol.
Talǵat Nurǵojınniń aıtýynsha, bul yntymaqtastyq barlyq taraptarǵa tıimdi. Ýnıversıtet kolledj oqytýshylary úshin doktorantýrada oqýdy uıymdastyrýǵa, oqý prosesine jańa tehnologııalardy engizýge qabiletti. Ol óz sózinde Japonııa jáne basqa da damyǵan elderdiń joǵary oqý oryndarymen tyǵyz baılanys ornata otyryp, jambyldyq oqytýshylar men dárigerlerdiń biliktiligin arttyrý úshin sol jaqqa jiberýge bolatynyn, jumys jolǵa qoıyla kele basqa da múmkindikter ashylatynyn aıtty. Al, Berdibek Saparbaev tórt kompıýterlik apparat pen eki magnıtti-rezonanstyq tomografııa, angıograftar jáne basqa zamanaýı jabdyqtar satyp alý josparlary týraly qysqasha aıta kelip, mundaı qondyrǵylar árbir aýdanda bolýy kerektigin jetkizdi.
Jambyl oblysy