Koronavırýs pandemııasy jer-jahandy ábigerge salǵandyqtan, shartaraptyń túkpir-túkpirindegi buqaralyq aqparat quraldary negizinen indetke qatysty jańalyq taratty. Degenmen, Batystyń bedeldi basylymdary ara-tura bolsa da álemniń «toǵyzynshy terrıtorııasy» sanalatyn Qazaqstandaǵy ahýaldan aqparat berýdi umytqan joq. Osy oraıda, 2020 jyly álemniń medıa ókilderi elimizge qatysty jazǵandaryna sholý jasap kórgen edik.
Memleket basshysy Qasym-Jomart Toqaevtyń Qaýipsizdik jónindegi 56-shy Mıýnhen konferensııasy aıasyndaǵy paneldik pikirtalasqa qatysýy shartaraptyń nazaryn Qazaqstanǵa aýdardy.
The Economic Times gazetiniń habarlaýynsha, atalǵan paneldik pikirtalasta kóterilgen máselelerdiń ózektiligin ýaqyt kórsetip otyr. Aýǵanstanda turaqtylyq ornatý jónindegi Qazaqstan bastamalaryna toqtalǵan basylym elimizdiń óz erkimen ıadrolyq qarýdan bas tartýyn da joǵary baǵalady. The Economic Times gazetiniń paıymdaýynsha, mundaı qadam qazaq halqynyń danalyǵy men kóregendigin anyq ańǵartady.
Euractiv agenttigi Memleket basshysynyń Eýrazııalyq ıntegrasııany ilgeriletýdegi Qazaqstannyń róli jónindegi sózine ekpin berdi. Pikirtalas kezinde Q.Toqaev Eýrazııalyq ekonomıkalyq odaqtyń saıası astary joq, ekonomıkalyq joba ekenin aıtty. Sondaı-aq 182 mıllıonnan astam turǵyny bar aımaqty qamtyǵan bul uıymnyń shetelden ınvestısııa tartýdaǵy áleýeti jóninde áńgimelep berdi.
Jyl basynda AQSh-tyń Memlekettik hatshysy Maık Pompeo elordaǵa at basyn burǵany belgili. M.Pompeo myrzanyń osy sapary kezinde álemniń barsha buqaralyq aqparat quraldarynyń nazary Uly dalaǵa aýdy.
Qazaqstannyń Syrtqy ister mınıstri Muhtar Tileýberdimen kezdesýi barysynda M.Pompeo ekijaqty yntymaqtastyq máselesin talqylaı kele, Qytaıdaǵy etnostyq qazaqtardyń jaǵdaıyn aıtyp ótken edi.
«Reıters» agenttigi M.Pompeonyń Qytaıdaǵy musylmandardy qýdalaýyna qatysty sózine ekpin berdi. «Pompeo áńgime barysynda Qazaqstan shekarasyna taıaý mańdaǵy Shyńjań avtonomııalyq aýdanynda (Qytaı) musylman uıǵyrlar men etnostyq qazaqtarǵa Qytaıdyń kommýnıstik partııasynyń qysym kórsetýi týraly aıtty. M.Pompeo AQSh búkil memleketti Qytaıdyń qýdalaýyn toqtatýyn talap etýge qosylýǵa shaqyratynyn, osy elden qashqandarǵa saıası pana usynyp, bosqyn mártebesin berýdi suraıtynyn jetkizdi» dep habarlady «Reıters» agenttigi. Budan bólek, Deutsche Welle, Sınhýa sekildi agenttikter de osy sapar týraly, AQSh pen Qazaqstannyń arasyndaǵy qarym-qatynas jóninde jarysa jazdy.
The Diplomat portaly elimizge qatysty kóptegen saraptamalyq maqala jarııalady. Sonyń biri – latyn qarpine aýysýǵa arnaldy. «Qazaqstan latyn álipbıine kóshýdiń uzaq jolyna tústi» dep atalatyn maqalada avtor qazaq halqynyń álipbı tańdaýyna tarıhı, mádenı jáne praktıkalyq jaǵdaılar áser etti dep oı túıedi.
«Qazaq halqy tutynǵan álipbıler ǵasyrlar boıy saıası jaǵdaılarǵa baılanysty túrli ózgeristerdi bastan ótkerdi. Qazaq tili túrki tilder tobyna jatady. Qazaq tili negizinen Ortalyq Azııa, Qytaı, Aýǵanstan, Irandy mekendegen qazaqtar men álemdegi qazaq dıasporalarynyń ana tili», deıdi avtor.
Atalǵan portaldaǵy taǵy bir saraptama Qazaqstannyń bitimgerlik mıssııasyna arnalǵan. Qazirgi tańda elimizdiń sarbazdary Lıvandaǵy UNIFIL mıssııasy aıasynda bitimgerlik operasııalaryna qatysyp júr.
Maqala avtory – Qorǵanys jáne geosaıası máselelerdi zerttep júrgen amerıkalyq sarapshy Ýılder Alehandro Sanches Qazaqstannyń UNIFIL aıasynda Lıvanǵa júzden asa sarbaz jiberýi keıingi jyldary bul baǵyttaǵy jumystyń belsendi atqarylyp jatqanyn kórsetetinin jetkizgen.
«BUU derekterine súıensek, qazirgi tańda Qazaqstannyń 128 áskerı qyzmetkeri bitimgerlik mıssııalarymen aınalysady. Iаǵnı osy salaǵa úles qosqan memleketter arasynda 66-orynda tur. Qazaqstannyń bitimgerlik mıssııasyna qatysyp júrgen áskerı qyzmetkerleriniń sany BUU bitimgerlik mıssııasyna eń kóp úles qosýshy el – Efıopııaǵa (6650 sarbaz) qaraǵanda áldeqaıda az. Áıtse de Qazaqstan – Ortalyq Azııadaǵy basqa elderge qaraǵanda bitimgershilik mıssııasynda kóp qyzmetkeri bar memleket. Máselen, Qyrǵyzstan nebári 12 adam ǵana jibergen. Soǵan qaramastan qazaq sarbazdary UNIFIL aıasyndaǵy mıssııasyn sátti oryndady deýge tolyq negiz bar», deıdi ol.
The Guardian gazeti Qazaqstannyń tumsa tabıǵaty týraly jazyp, týrısterge kerekti qundy málimet usynady. «Álemniń ashyq teńizge shyǵa almaıtyn eń úlken memleketi sanalatyn Qazaqstan soltústiginde Reseımen, shyǵysynda Qytaımen shektesip jatyr. Elde klassıkalyq qurlyqtyq klımat qalyptasqan. Qysy sýyq, jazy janǵa jaıly jyly.
Qazaqstannyń soltústigi ońtústigine qaraǵanda sýyqtaý bolǵandyqtan, kóktem men kúz salqyn. Biraq qońyrsalqyn sátteri kóp. Sondyqtan, bul elge sáýir men maýsym, qyrkúıek pen qazan arasynda barýǵa keńes beremiz», deıdi The Guardian.
Forbes jýrnaly bıylǵy indet pen munaı baǵasynyń quldyraýy Qazaqstanǵa ońaı tımegenin, biraq senim artýǵa bolatyn bir mekeme bar ekenin jazady. Ol – Astana halyqaralyq qarjy ortalyǵy.
«Arhıtektýralyq dızaıny Epcot Center-ge uqsaǵanymen, bul ortalyq Qazaqstannyń Tuńǵysh Prezıdenti Nursultan Nazarbaevtyń tól týyndysy. Astana halyqaralyq qarjy ortalyǵy elde de, shetelde de Qazaqstannyń zamanaýı kelbeti sanalady», deıdi Forbes.