Pandemııa
Jahandy belgisiz indet jaýlap, adamzattyń qalypty ómirin bir sátte ózgertip jiberdi. Biz biletin tirshilik jańasha sıpat alyp, pandemııa áserin sezinbegen jan qalmady. Dúnıe júzinde barlyǵy 82 mln-nan astam adam vırýs juqtyryp, onyń 1 mln 800 myńnan astamy qaıtys boldy. Vırýstyń belgisiz bul túri 191 elde tirkeldi. UNESCO-niń málimetine sensek, 264 mln bala mektepke barmaı, úıinen sabaq oqyǵan. Bul jahandyq daǵdarystyń barlyq saldaryn anyqtap, baǵalaý úshin birneshe jyl ketetini anyq.
Ekonomıkalyq krızıs
Pandemııanyń salqyny tıgen eń iri salalardyń biri ekonomıka boldy. Pandemııa tabysy az elderden bastap damyǵan alpaýyt memleketterge deıin áser etti. Ulybrıtanııa ekonomıkasyn resessııada dep málimdedi. Álem halqynyń úshten birinen kóbi «úı qamaqta» otyrýǵa májbúr bolyp, jahandyq ekonomıka turalap qaldy dese de bolady. Oǵan qosa «Breksıt», AQSh – Qytaı teketiresi de ǵalamdyq ekonomıkany baıaýlatqan-dy. 2020 jyly elderdiń ishki jalpy ónimi de tómendeı tústi. Mamandar bul daǵdarystan qashan shyǵatynymyzǵa naqty boljam aıta almaı otyr.
Mınskidegi sherýler
Postkeńes aýmaǵy bıyl saıası janjaldarǵa qatysty jıi ataldy. Onyń biri – Belarýs Respýblıkasynda bolǵan narazylyq. Prezıdent saılaýynyń nátıjesine razy bolmaǵan turǵyndar beıbit sherýge shyqqan-dy. Alaıda sońy qaqtyǵysqa ulasqan janjaldan zardap shekkender de bar. Bul eldegi saıası ahýaldyń kúrdelene túsip, halyq pen bılik arasyndaǵy baılanystyń alshaqtaı túskenin anyq kórsetti. Narazy halyq áli degenine jetpese de, eldegi bılikke degen salqyn kózqarasty baıqamaý múmkin emes.
Qarabaqtaǵy qaqtyǵys
2020 jyl kópten beri jalǵasyp kele jatqan kúrmeýi qıyn kúrdeli máselelerdiń shıelenisken jyly retinde este qaldy. Ázerbaıjan men Armenııa arasynda Taýly Qarabaqqa baılanysty jer daýy bıyl qaıta órshidi. Qarýly qaqtyǵysqa ulasqan osy soǵysta Ázerbaıjan óziniń Armenııa basyp alǵan tarıhı aýmaǵynyń belgili bir bóligin qaıtaryp aldy. 10 qarasha kúni taraptar kelisimge kelip, aımaqta atysty jáne barlyq áskerı áreketti toqtatý týraly málimdeme jasaldy. Osylaısha, ótip bara jatqan jyl Ázerbaıjan memleketi úshin tarıhı kezeńge aınaldy.
AQSh-taǵy saılaý
2020 jyl qaı jaǵynan alsaq ta oqıǵaǵa baı boldy. Bıyl álem elderi asa qyzyǵýshylyqpen baqylaǵan saıası jańalyqtardyń biri – Tramp-Baıden básekesi bolǵany sózsiz. Sarapshylar jasaǵan aldyn ala boljamdardyń bir-birine keraǵar bolýy men qaı kandıdattyń jeńiske jetetinin sońyna deıin bilmeý saıası báıgeni qyzdyra tústi. Pandemııa jaǵdaıynda ótken saılaýda daýys berý tásilderi de ózgerdi. Tartysty básekede jeńiske jetken 78 jastaǵy Djo Baıden – AQSh tarıhyndaǵy jasy eń úlken bıleýshi. Al Kamala Harrıs bolsa tarıhtaǵy vıse-prezıdent atanǵan alǵashqy ózge násildi áıel.
Kórshi eldegi kezekti «tóńkeris»
Parlament saılaýyn qaıta ótkizýdi talap etken narazylyqtyń sońy jalpyulttyq qaqtyǵysqa ulasty. Nátıjesinde el prezıdenti Sooronbaı Jeenbekov óz erkimen otstavkaǵa ketti. Indetpen qatar janjaldyń aldyn alýǵa tyrysqan bılik qaýipsizdik sharalaryn saqtaýǵa shaqyrýmen boldy. Bul oqıǵa eldiń ekonomıkasyna jáne ınvestısııalyq ahýalyna áser etip qana qoımaı, kóptegen zań buzýshylyq faktileri de tirkeldi.
Qıyr shyǵystaǵy ereýil
Reseıdiń qıyr shyǵysynda qala turǵyndary Habarovsk aımaǵynyń eks-gýbernatory Sergeı Fýrgaldy qoldaý úshin alańǵa shyqty. Qatysýshylar mundaı iri jıyndardyń qalada buryn-sońdy bolmaǵanyn aıtqan. Gýbernatordyń tutqyndalýy, sot otyrysynyń ózge óńirde ótýi jáne bılikten ketýi halyqtyń ashýyn keltirip, qoǵamdyq rezonans týdyrdy. Tergeý barysynda saıasatker birneshe adam ólimin uıymdastyrdy dep aıyptalǵan. Shilde-qyrkúıek aılaryna sozylǵan myńdaǵan adam jınalǵan mıtıngter Reseıdegi bıylǵy aıtýly oqıǵalardyń birine aınaldy.