«Qazaqtelekom» táýelsiz Qazaqstan tarıhyndaǵy eń iri telekommýnıkasııalyq jobany – aýyldyq eldi mekenderge arnalǵan talshyqty-optıkalyq baılanys jelileri qurylysyn aıaqtady. 25 jeltoqsan kúni Túrkistan oblysyndaǵy sońǵy 828-shi aýyl joǵary jyldamdyqty ınternetke qosyldy. Joba júzege asyrylǵan 2 jyl ishinde búkil el boıynsha 14 514 shaqyrymdyq optıka tartyldy.
Talshyqty-optıkalyq baılanys jelilerin salý baǵytynda júzege asqan aýqymdy jáne asa kúrdeli joba eldiń búkil ekonomıkasyna oń áserin tıgizdi. Atap aıtqanda, jelilerdi salý kezinde jelilik ádis paıdalanylyp, jumystar barlyq aýdandarda bir mezgilde qatar júrgizildi. Bul iske jergilikti qosalqy merdigerler belsene aralasty. Sonymen qatar «Qazaqtelekom» mamandary ár óńirdiń tabıǵı, geografııalyq erekshelikterine baılanysty, jeli tartýdyń túrli ádisterin qoldanýǵa májbúr boldy. Iаǵnı talshyqty-optıkalyq jeliler keıde taý-tasty, keıde ný ormandy, egistik alqapty, al keıde ózen-kólderdi qıyp ótti. Mundaı jaǵdaıda jobany ózgertip, tabıǵatqa zııan keltirmeıtindeı amaldar qarastyryldy.
– Biz aýyldarǵa talshyqty-optıkalyq baılanys jelilerin tartý baǵdarlamasy aıasynda sheship otyrǵan basty másele – qala men aýyl arasyndaǵy sıfrly teńsizdikti joıý, elimizge telekommýnıkasııa qyzmetteriniń barlyq spektrin usyný ekenin atap ótken jón», deıdi «Qazaqtelekom» AQ basqarma tóraǵasy Qýanyshbek Esekeev.
Jalpy, talshyqty-optıkalyq baılanys jelileri jobasy aıasynda 828 aýyldaǵy 2 496 memlekettik mekeme men bıýdjettik uıym optıkaǵa qosyldy. Jospar boıynsha sońǵy qurylys-montaj jumystary 25 jeltoqsan kúni Túrkistan oblysynda mejesine jetti. Aıta keteıik, munda eki jyl buryn keń jolaqty ınternet az ǵana turǵyndaryna qoljetimdi edi. Qazir júırik ınternettiń ıgiligin kórgen eldi mekender sany júzdep ósti.
– 175 eldi mekendi keń jolaqty ınternetpen qamtamasyz etý úshin 1 567 shaqyrym talshyqty-optıkalyq baılanys jelileri tartyldy. Sonymen qatar oblysta tehnıkanyń jumys isteýi qıyn jerler kóp boldy. Olar «optıka» qurylysyn aıtarlyqtaı tejedi. Bul – taýly jerler, ózender men saılar, gaz qubyrlary jáne basqa da kommýnıkasııalar. Biraq biz jobany ýaqytynda júzege asyrý úshin barymyzdy saldyq, – deıdi «Qazaqtelekom» AQ Ońtústik aımaqtyq telekommýnıkasııa dıreksııasy jergilikti jelilerdiń tehnıkalyq torabynyń dırektory Nurlan Shotyqov.
Túrkistan oblysynyń Qazyǵurt aýdanynda 30 aýylda «optıka» paıda boldy. Jergilikti turǵyndar zamanaýı sıfrly qyzmetterdi paıdalanýdyń artyqshylyqtaryn sezinip úlgerdi. Jańabazar aýylynda polısııa bólimshesi men órt sóndirý bólimine keń jolaqty ınternet berildi. Polısııa kapıtany, Qazyǵurt aýdandyq polısııa bóliminiń ýchaskelik ınspektory Qýanysh Qoılybekovtiń aıtýynsha, baılanys sapasy áldeqaıda jaqsarǵan.
– Biz 12 myńnan astam turǵyny bar segiz aýylǵa qyzmet etemiz. Buryn baıaý ınternet bizdiń jumysymyzǵa kóp kedergi keltirdi. Endi biz derekterdi jyldam qabyldap, jibere alamyz. Sonymen qatar joǵary jyldamdyqty ınternet aýyldarda qosymsha qyzmetterdi ornatýǵa múmkindik beredi, mysaly, beınebaqylaý. Turǵyndardyń kóbinese maly urlanady. Qylmystyń ashylýyna beınekameralar kóp kómektesedi. Beınebaqylaý sonymen qatar mektepterde, dúkender men emhanalarda baqylaýdyń tıimdi quralyna aınalady, – deıdi Qýanysh Qoılybekov.
Aýyldyq densaýlyq saqtaý mekemeleri de keń jolaqty ınternetpen qamtamasyz etilgen. Dárigerler medısınalyq aqparattyq júıege qosylyp, qaǵazbastylyqtan qutylýǵa qaryshty qadam basty. Qarabaý aýyldyq okrýgi dárigerlik ambýlatorııasynyń bólim meńgerýshisi Qaırat Qurbanqulov «optıka» qosqannan beri oblys ortalyǵynyń dárigerlerimen birge beınekonferensııalarǵa qatysyp júr. Bul burynǵy baılanys sapasymen múmkin emes edi.
Sonymen qatar talshyqty-optıkalyq baılanys jelilerine qosylý osy aýyldyń barlyq turǵyndaryn sapaly uıaly baılanyspen qamtamasyz etti. Sebebi uıaly baılanys operatorlary talshyqty-optıkalyq baılanys jelileri jobasynyń negizinde ekinshi mańyzdy «250+» baǵdarlamasyn júzege asyrdy. Osy arqyly aýyldyq jerlerde mobıldi keń jolaqty ınternet 3G/4G jelileri damydy. Bul baǵdarlama búkil el boıynsha «Qazaqtelekom» qurǵan talshyqty-optıkalyq baılanys jelisiniń ınfraqurylymy negizinde júzege asyrylýda.
– «Qazaqtelekom» kompanııalar tobynyń uıaly baılanys operatorlary – Kcell jáne Tele2 qazirdiń ózinde 300-ge jýyq bazalyq stansa ornatyp, jumystaryn belsendi jalǵastyrýda. Jalpy, «250+» jobasynyń nátıjesinde 600 myńnan astam turǵyny bar 1000-ǵa jýyq aýyl joǵary jyldamdyqty mobıldi ınternet pen baılanysqa qol jetkizedi. Sonymen qatar bul qazaqstandyq aýyldyń ekonomıkalyq damýyna oń áserin tıgizedi, óńirlerde mobıldi qarjylyq qyzmetter men elektrondy saýdany damytýdyń qozǵaýshy kúshine aınalady, sonymen qatar aýyl sharýashylyǵynda derekter taratý jelisi tehnologııalaryn qoldanýǵa jol ashady, – dedi Q.Esekeev.