Májilis Tóraǵasy Nurlan Nyǵmatýlın Memleket Basshysy Qasym-Jomart Kemeluly Toqaevtyń «Egemen Qazaqstan» gazetinde jarııalanǵan «Táýelsizdik bárinen qymbat» atty mazmundy maqalasyna oraı óz pikirin bildirdi, dep habarlaıdy Egemen.kz.
Nurlan Nyǵmatýlın atap ótkendeı, 2021 jyl biz úshin erekshe, sebebi, osy jyly biz ata-babalarymyz ǵasyrlar boıy ańsaǵan, qasıetti táýelsizdigimizdiń 30 jyldyǵyna qadam bastyq.
Májilis Tóraǵasynyń aıtýynsha, maqalada memleketimizdiń qalyptasý, damý, órkendeý joly «Baǵdar men beles», «Tanym men taǵlym», «Qoǵam men qundylyq» jáne «Ulaǵat pen ustanym»,-dep atalatyn tórt aýqymdy baǵytty qamtı otyryp, «Otyz jylda biz qandaı jetistikterge jettik?», «Keler urpaqqa qandaı eldi amanattaımyz?», «Memlekettigimizdi nyǵaıta túsý úshin taǵy ne isteımiz?»,-degen suraqtardyń aıqyn jaýabyn kórsetken.
Prezıdent atap ótkendeı, tarıh turǵysynan alǵanda, otyz jyl – kózdi ashyp jumǵandaı qas-qaǵym sát. Degenmen, bul kóptegen halyqtar úshin qıyndyǵy men qýanyshy, daǵdarysy men damýy almasqan tutas dáýir deýge bolady. Biz de osyndaı joldan ótip kelemiz.
Májilis Tóraǵasy alǵashqy onjyldyqta Elbasymyz Nursultan Ábishuly Nazarbaevtyń basshylyǵymen memlekettik nyshandarymyz belgilenip, bılik júıemiz qalyptasty. «Qazaqstan -2030» strategııasyn qabyldadyq.
Ekinshi onjyldyqta memleketimizdiń tuǵyry nyǵaıyp, ekonomıkalyq áleýetimiz artqanyn, úshinshi onjyldyqta «Qazaqstan – 2050» strategııasyn qabyldap, ozyq damyǵan otyz eldiń qataryna qosylýdy josparlap otyrǵanyna toqtaldy.
Nurlan Nyǵmatýlın óz sózinde: - Osy kezeńderde bilim, densaýlyq, áleýmettik jaǵdaı, rýhanı baılyǵymyz, patrıottyq rýhymyz, basqa da elimizdiń barlyq salalary zaman talabyna saı qarqyndy ósip otyrdy. Bul Elbasymyz bastap, Memleket Basshysy jalǵastyrǵan maqsaty berik, bolashaǵy aıqyn, senimi nyq qazaqstandyq úzdiksiz damý jolymyz, - dedi.
Endi aldaǵy tórtinshi onjyldyqtaǵy basty mindet – qýatty el jáne kemel halyq bolý ekenin alǵa tartqan Palata Spıkeri osy jolda eń basty baǵdar bilimdi urpaq ekenin aıtyp, jas býynǵa jan-jaqty qoldaý kórsete otyryp, básekelik qabiletin arttyrýǵa basa kóńil bólinetinine basa kóńil bólinetinin jetkizdi.
- Memleket Basshysynyń maqalasy-elim, jerim deıtin, táýelsizdikti qorǵaýǵa, saqtaýǵa úles qosýǵa tıis árbir azamat úshin aqyl qalta sııaqty aıqyn baǵdar deýge bolady. Sonymen birge, búkil qoǵamdy uıystyratyn qundylyqtardy jınaqtaı otyryp, el birligin, ult tutastyǵyn, memleket órkenıetin qamtamasyz etýge arnalǵan naqty tarıhı qujat, - dedi Nurlan Nyǵmatýlın.
Májilis Tóraǵasy atap ótkendeı, Memleket Basshysynyń maqalasy árbir qazaqstandyqtyń júreginen oryn alyp, rýhyn asqaqtatýǵa serpin beretini sózsiz.