ADAL partııasynan Májilis depýtattyǵyna kandıdattar aımaqtyq saılaýshylarmen kezdesýlerin jalǵastyrýda. Semeı qalasynda kandıdattar Ardaq Nazarov, Dáýlet Muqaev, Oljas Ordabaev, Almasbek Sadyrbaev saılaýshylarmen birqatar kezdesý ótkizdi.
Oljas Ordabaev qurylys materıaldaryn shyǵaratyn jergilikti kompanııanyń jumysshylarymen kezdesti. Depýtattyqqa kandıdat ADAL partııasynyń negizgi maqsattary, mindetteri týraly aıtyp, Adalpartiyasi.kz saıtynyń qyzmetteri jaıynda sóz qozǵady. «Sizdiń aımaǵyńyzdyń problemalary» servısin taldap, múmkindikterin túsindirdi. Ondaǵy derekter kezdesýge qatysýshylardyń qyzyǵýshylyǵyn týdyrdy. Kompanııa qyzmetkerleri memleket aımaq turǵyndarynyń zeınetke shyǵý jasyn qaıta qaraýy kerektigin alǵa tartty. «Tek meniń otbasymda tórt býynnyń problemasy bar. Jaqynda ákem qaıtys boldy, týystarym onkologııadan kóz jumdy. Munyń bári ıadrolyq polıgonnyń zalalynyń saldary. Bizde 70 jyl – uzaq ómir súrý jasy bolyp sanalady, elestetip kórińizshi? Zeınetkerlik jasty qaıta qaraý qajet», dedi azamattardyń biri.
O.Ordabaev Agrobıznes jáne ekonomıka kolledjinde jastarmen jáne oqytýshylarmen kezdesý kezinde qatysýshylar partııanyń saılaýaldy baǵdarlamasynyń bilim berý blogyna nazar aýdardy. Olar muǵalim mártebesine toqtalyp, barlyq sanattaǵy ustazdar úshin erekshe mártebe alýdyń mańyzdylyǵyn atap ótti. «Bıyl muǵalimder mártebesi týraly zań qabyldandy, biraq ol kóbinese mektep muǵalimderine qatysty. Muǵalimderdi bólip-jarýǵa bolmaıdy, árkimniń laıyqty mártebesi bolýy kerek deımiz. Bul oıdan shyǵarylǵan nárse emes. Biz buǵan qol jetkize alamyz», dedi partııa ókili.
Kolledj oqytýshylary bilim berý uıymdaryn qarjylandyrýdyń jetkiliksizdigi máselesin aıtty. Sonymen qatar dýaldy oqytý problemasyn atap ótti. Muǵalimder praktıkalyq saǵattardyń sanyn kóbeıtýdi surap otyr.
Kóp balaly otbasylarmen jáne kásipkerlermen ótkizilgen kezdesýlerde turǵyndar birqatar túıtkildi máseleni kóterdi. Onyń ishinde turǵyn úıdiń jetispeýshiligi, alǵashqy tólemge qarajattyń tapshylyǵy, páter alýdy jeńildetetin jańa jaǵdaılardy ázirleý qajettiligi syndy másele bar. Sonymen qatar turǵyndar bızneske arnalǵan granttardy bólýdiń ashyqtyǵyn qamtamasyz etýge nıet bildirdi. «Jer óte kóp, biraq ony satyp alý múmkin emes, al jalǵa alý óte qymbat. Ákimdik jer ýchaskelerin paıdalanýǵa múldem múmkindik bermeıdi», dep shaǵymdandy kásipkerlerdiń biri.
Dáýlet Muqaev partııanyń veb-saıty arqyly belgili bir aımaqta memleket qarjysynyń nege jumsalatynyn naqty kórsetti: «Bıýdjet qarajaty jergilikti halyqtyń naqty problemalary men qajettilikterin eskere otyryp, jumsalýy kerek», degen ol partııanyń ustanymy osyǵan saıatynyn aıtty.
Taldyqorǵanda Májilis depýtattyǵyna úmitker Lázzat Shyńǵysbaeva da kásipkerlermen jáne jastarmen kezdesýler ótkizýdi jalǵastyrdy. Ol qalanyń ortalyq bazarynyń qyzmetkerlerimen júzdesti. Kásipkerler partııa birqatar máseleni sheshýge úles qossa degen tilekterin bildirdi. Olardyń pikirinshe, medısınalyq saqtandyrý qoryna aýdarymdar tek erikti túrde júrgizilip, jas urpaq úshin jańa jastar saıasaty iske asyrylýy kerek. Onyń sheńberinde, eń aldymen, jumyspen qamtý jáne óz-ózine qyzmet kórsetýdi júzege asyrý úshin jańa múmkindikter jasaý qajet.