Memleket basshysy Qasym-Jomart Toqaev Parlament májilisi men máslıhat depýtattary saılaýyna qatysty pikir bildirdi, dep habarlaıdy Egemen.kz. Sondaı-aq Prezıdent baspasóz brıfınginde saılaý - kez kelgen eldiń ómirindegi mańyzdy oqıǵa ekenin atap ótti.
"Búgin halqymyz úshin erekshe kún. Sebebi saılaý - kez kelgen eldiń ómirindegi mańyzdy oqıǵa. Bárimiz ult bolyp, halyq bolyp daýys berip jatyrmyz. Bul saılaý halqymyzdyń odan ári damýyna odan ári serpin beredi. Jalpy, Parlamentke neǵurlym kóp partııa kirse, elimizdiń bolashaǵy úshin jaqsy bolady dep úmittenemin. Sondyqtan saılaý jaqsy ári ádil bolady dep oılaımyn", dedi Memleket basshysy.
Q.Toqaev Parlamenttiń negizgi mindeti sapaly túrde zańdardy qabyldaý ekenin de sóz etti. Prezıdenttiń aıtýynsha, Qazaqstan úshin sapaly zańnama júıesi kerek.
"Bul saılaý eldegi demokratııany damytýdyń basty qadamdarynyń biri bolady dep oılaımyn. Ár saılaý azamattyq qalyptasýyndaǵy mańyzdy emtıhan. Parlamentimizde túrli partııa bolady dep úmittenemin. Eldiń damýy úshin Parlamentte ashyq pikirtalas bolýy qajet. Sondaı-aq Parlament sapaly zańdar qabyldaýy kerek.
Azamattyq qoǵamnyń saılaýaldy naýqanyndaǵy belsendiligi joǵary. Úmitkerler kóp. Ár úmitkerge teń jaǵdaı jasaldy. Jalpy, saılaý zańǵa sáıkes ótip jatyr. Eshqandaı zańbuzýshylyq baıqaǵanymyz joq. Degenmen, qadaǵalap otyrmyz. Bul saılaý halqymyz, azamattyq qoǵam úshin úlken synaq. Sondyqtan bári jaqsy ótedi dep oılaımyn", dedi ol.