Atyraý qalasyndaǵy «Senim» elıtarlyq mektep-balabaqsha kesheninde №7 saılaý ýchaskesi ornalasqan. Ýchaskelik komıssııa tóraǵasy Aınagúl Ahmetovanyń aqparatyna qaraǵanda, munda 2 691 saılaýshy tirkelipti, dep habarlaıdy Egemen.kz
«Bizdiń saılaý ýchaskesinde tirkelgen eń qart saılaýshy Nadımýlla Ǵabdýrınniń jasy – 92-de. Jasynyń egdeligine baılanysty bul saılaýshynyń daýys berýi úshin saılaý jáshigi úıine jiberildi. Al tańǵy saǵat 7.00-de 62 jastaǵy Kenjebaı Dúısenǵalıev alǵashqy bolyp tańdaýyn jasady. Oǵan arnaıy syılyq berildi. Sondaı-aq mundaı múmkindikke 18 jasqa tolyp, eń alǵash daýys berýshiler de ıe boldy» deıdi Aınagúl Maqsotqyzy.
Atalǵan saılaý ýchaskesinde 9 baıqaýshy daýys berý barysyn baqylap otyr. Onyń biri –halyqaralyq baıqaýshy. Ýchaskede sanıtarlyq talaptar saqtalǵan. Bir ereksheligi, munda daýys berýge kelgen saılaýshylarǵa shubat pen baýyrsaq usynady.