Qyrǵyzstandaǵy prezıdenttik saılaýda jeńiske jetken Sadyr Japarov saılaýshylarǵa prezıdenttik saılaýda kórsetken qoldaýy úshin alǵysyn bildirdi, dep habarlaıdy Egemen.kz tilshisi «Anadoly» agenttigine silteme jasap.
Qyrǵyzstandaǵy qazirgi problemalardy sheshý úshin kem degende 1-2 jyl qajet bolady. Bul týraly Sadyr Japarov Bishkekte ótken baspasóz konferensııasynda aıtty.
S. Japarov eger saıası turaqtylyq bolsa, Qyrǵyzstandy 3-4 jyldan keıin ekonomıkalyq daǵdarystan shyǵaratynyna ýáde berdi.
Saıasatker sońǵy 30 jyl ishinde sybaılas jemqorlyq ómirdiń barlyq salasynda tamyr jaıǵanyn jáne árbir azamat onymen kúresýge kúsh salýy kerek ekenin atap ótti.
«Men aldyńǵy bıliktiń qatelikterin qaıtalamaımyn. Biz saıası qysymnan aýlaq bolamyz jáne zańdylyq qaǵıdasyn buzýshylarǵa jol bermeımiz. Meniń jalǵyz maqsatym - eldiń damýy, birlikti qamtamasyz etý», dep ýáde etti jańa saılanǵan memleket basshysy.
Sondaı-aq ol saılaýǵa qatysqan ózge kandıdattar men olardyń úgitshilerine degen esh renishi joq ekenin aıtty.
Eske sala keteıik, Qyrǵyzstan saılaý komıssııasynyń jetekshisi Nurjan Shaıldabekova jeksenbi kúngi saılaýdaǵy daýys berýdiń aldyn-ala qorytyndylary boıynsha saılaýshylardyń 79,18 paıyzy Sadyr Japarovqa daýys bergenin habarlaǵan bolatyn.