Qazaqstanda 2021 jylǵy 1 qańtardan bastap áleýmettik sala qyzmetkerleriniń laýazymdyq jalaqysy 50% - ǵa ósti. 2022 jyly laýazymdyq jalaqy 25% – ǵa, al 2023 jyly taǵy 25% - ǵa ósedi. Bul maqsatqa memlekettik bıýdjetten aldaǵy úsh jylǵa 95 mlrd teńge bólindi.
QR Úkimetiniń aǵymdaǵy jylǵy 12 qańtarda ótken otyrysy aıasynda «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna ózgerister engizý týraly» qaýly qabyldandy, oǵan sáıkes óz qyzmetin stasıonarlyq jáne jartylaı stasıonarlyq úlgidegi medısınalyq-áleýmettik mekemelerde (budan ári – MÁM), úıde qyzmet kórsetý uıymdarynda, ýaqytsha bolý uıymdarynda jáne jumyspen qamtý ortalyqtarynda júzege asyratyn basshy quram men negizgi personaldyń (áleýmettik qyzmetkerler, pedagogtar, medısına qyzmetkerleri jáne t.b.) laýazymdyq jalaqysyn úsh jyl ishinde arttyrý kózdelgen.
Nátıjesinde 2021 jylǵy 1 qańtardan bastap osy qyzmetkerlerdiń laýazymdyq aılyqaqysy 50%-ǵa, 2022 jyly aǵymdaǵy mánnen 25%-ǵa, 2023 jyly taǵy 25%-ǵa ósedi.
Qaýlyda sondaı-aq qoldanystaǵy qosymsha aqynyń mólsherin bazalyq laýazymdyq jalaqynyń 30% - ynan laýazymdyq jalaqynyń 40% - yna ózgertý jolymen stasıonarlyq jáne jartylaı stasıonarlyq úlgidegi MÁM-de, úıde qyzmet kórsetý jáne ýaqytsha bolý uıymdarynda jumys isteıtin ákimshilik jáne qosalqy personal úshin jalaqyny arttyrý kózdelgen.
Osy máseleni iske asyrý áleýmettik qorǵaý qyzmetkerleriniń eńbekaqy deńgeıin bilim berý jáne densaýlyq saqtaý salalary qyzmetkerleriniń jalaqysyna jaqyndatýǵa múmkindik beredi, bul kadrlardy saqtaýǵa jáne halyqqa sapaly áleýmettik qyzmet kórsetýge yqpal etetin bolady.