Syrtqy ister mınıstrligi ýákiletti memlekettik organdarmen birlesip Taıaý Shyǵystaǵy qaqtyǵys aımaǵynan Qazaqstan azamattaryn elge qaıtarý jumystaryn jalǵastyryp jatyr. Evakýasııa bastalǵaly beri ýákiletti memlekettik organdardyń, rezıdent jáne rezıdent emes áýe kompanııalarynyń kómegimen 8 585 otandasymyz elge qaıtaryldy, dep habarlaıdy Egemen.kz.
«Biz otandastarymyzdyń qaýipsizdigin qamtamasyz etý úshin bar kúsh-jigerimizdi jumsap, kez kelgen jaǵdaıda jan-jaqty qoldaý kórsetip kelemiz. Qazirgi ýaqytqa deıin Qazaqstan azamattarynyń arasynda zardap shekkender nemese qaza bolǵandar týraly aqparat túsken joq», dedi Syrtqy ister mınıstrliginiń resmı ókili Erlan Jetibaev.
Evakýasııa bastalǵaly beri ýákiletti memlekettik organdardyń, rezıdent jáne rezıdent emes áýe kompanııalarynyń kómegimen 8 585 Qazaqstan azamaty elge qaıtaryldy.
Aldaǵy kúnderi:
• Izraılden – 78 azamatty,
• Qatardan – shamamen 350 adamdy,
• Birikken Arab Ámirlikterinen – shamamen 550 adamdy,
• Saýd Arabııasynan – shamamen 300 adamdy evakýasııalaý josparlanyp otyr. Kórsetilgen derekter ózgerýi múmkin.
Áýe reısterinen bólek, azamattardy shyǵarý jerústi joldary arqyly da júzege asyrylyp jatyr. Atap aıtqanda, Ázerbaıjan, Armenııa jáne Túrikmenstannyń qurlyqtaǵy shekaralary arqyly evakýasııalaý júrgizilýde. Osy jolmen Irannan 66 azamatymyz elge qaıtaryldy.
«О́ńirdegi Qazaqstannyń dıplomatııalyq ókildikteri evakýasııalaý jumystaryn úılestirýdi jalǵastyryp, otandastarymyzben turaqty baılanys ornatyp jatyr. Azamattardan Qazaqstan Respýblıkasynyń Syrtqy ister mınıstrligi men tıisti elderdegi dıplomatııalyq mekemelerdiń resmı habarlamalaryn únemi qadaǵalap otyrýdy suraımyz. Qazaqstan azamattarynyń qaýipsiz túrde elge oralýy memleket úshin basym mindet bolyp qala beredi», dedi Erlan Jetibaev.
Eske sala keteıik, Izraıl 28 aqpanda tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Búǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
Al qazir elimizdiń Syrtqy ister mınıstrligi Taıaý Shyǵys elderinen azamattarymyzdy evakýasııalaý jumysyn belsendi atqaryp jatyr.