Týrıstik salany damytýdyń 2019-2025 jyldarǵa arnalǵan memlekettik baǵdarlamasy qabyldanǵanyna aldaǵy mamyr aıynda eki jyl bolady. 2019 jyly qolǵa alynǵan joba qabyldanǵan sátten bastap búginge deıingi istelgen jumysty saraptap, baǵa berýi ázirshe erte. Degenmen elimizdegi ekotýrızmdi damytý jónindegi jańa baǵyt qazirdiń ózinde nátıje berip jatqanyn anyq ańǵarýǵa bolady.
Memlekettik baǵdarlama qabyldanǵan sátten bastap qysqa merzim ishinde Mádenıet jáne sport mınıstrligi eń úzdik álemdik tájirıbe negizinde ulttyq parkterde týrızmdi damytý boıynsha utymdy joba daıyndap, Premer-Mınıstr jáne Ekologııa, geologııa jáne tabıǵı resýrstar mınıstrligine usynǵan bolatyn. Atalǵan joba qoldaý taýyp, ony iske asyrý úshin jobalyq basqarýdyń jańa júıesi iske qosyldy. Nátıjesinde, Ile-Alataý parkindegi vızıt-ortalyq negizinde ulttyq parkterde ekotýrızmniń jańa formaty engizildi. Osylaısha, tek saqtaý tiregindegi «shekteýli» tásilden, turaqty damý negizinde «belsendi-jasampaz» tásilge kóshý utymdy engizilýde.
Halyqaralyq tájirıbeni keshendi zertteý AQSh ulttyq parkteriniń tıimdiligin kórsetti. Ondaǵy basqarý júıesi jalpy aýdany 34 mln ga, jyl saıyn 330 mln kelýshi keletin 61 federaldyq ulttyq parkterdi (Altyn Geıt, Shenandoa, Mýır, Iosemıt, Grıffıt, Grand Kanon jáne t. b.) qamtıdy.
Osy tájirıbeniń negizinde turaqty týrızm men bıoártúrlilikti damytý talaptaryn saqtaı otyryp, ekotýrızmdi damytýdy kózdeıtin tujyrymdama ázirlendi. Ulttyq parkterdegi týrıstik aǵyndardy júıeli damytý týrısterdiń tabıǵı kórikti jerlermen janasýynyń alǵashqy núkteleri bolatyn vızıt-ortalyqtar qurý arqyly júzege asyrylatyn bolady. Tolyqqandy týrıstik qyzmetterdi kórsetý úshin qajetti týrıstik ınfraqurylym qamtamasyz etiledi. Atap aıtar bolsaq, jaılastyrylǵan soqpaqtar, sholý alańdary, kempıng pen glempıngter, tamaqtaný pýnktteri, avto-úıge arnalǵan turaqtar jáne taǵy basqa da Ulttyq parkterdiń bas josparlaryna tıisti ózgerister engiziletin bolady.
2019 jyldan bastaý alǵan memlekettik baǵdarlamany tıimdi úılestirý úshin Mádenıet jáne sport mınıstrligi men Ekologııa, geologııa jáne tabıǵı resýrstar mınıstrligimen ulttyq parkter aýmaǵynda týrıstik qyzmetti damytý jónindegi birlesken qyzmet týraly sharttarǵa bastamashylyq jasady.
Sondaı-aq 2019 jyly Kazakh Tourism UK AQ, Almaty oblysy jáne Almaty qalasy ákimdikteriniń bazasynda óńirdin bes ulttyq parktiń aýmaǵyn qamtıtyn jáne Mádenıet jáne sport mınıstrligine qaraıtyn Almaty jáne Almaty oblysy ákimdikteriniń jáne árbir ulttyq parktiń ókilderin qamtıtyn Almaty taý klasterinde týrızmdi damytý jónindegi birlesken jobalyq keńse quryldy.
Qalyptasqan damý modeli ınvestorlardy tartý boıynsha tıimdi jumysty qamtamasyz etýge múmkindik beredi. 2020 jyly birlesken jumystyń nátıjesinde Ile-Alataý ulttyq parkiniń Aıýsaı shatqalynda turaqty qurylystyń barlyq standarttary boıynsha ekologııalyq materıaldardan salynǵan alǵashqy vızıt-ortalyǵy ashyldy.
«Aıýsaı» vızıt-ortalyǵy otandyq óndiristiń aǵash qurylymdarynan jınalǵan 3 modýlden turady. Ár modýl 200 m2 quraıdy, olardyń negizi metall baılanysy bar geoshýrýptar arqyly beton qoldanbaı salynǵan, al ǵımarattyń ózi tolyǵymen aǵash pen shynydan jasalǵan. Amerıkalyq tehnologııany qoldana otyryp, joba jeńil dızaın túrinde jasalǵan. Bul sheshimder arqyly, vızıt-ortalyq Aıýsaı shatqalynyń landshaftymen úılesim tapqan.
Sondaı-aq ekotýrızmdi damytý jobasy aıasynda tórt jyl ishinde 155 shaqyrym jaıaý júrginshiler arnalǵan soqpaqtar jóndelip, 17 jańa jaıaý júrginshi jáne velosıped súrleý joldary ashylady. Sonymen qatar 10 glempıng, 2 kempıng, 1 etnoaýyl jáne 1 kerýen toqtaıtyn oryn salý josparlanýda. Sonymen qatar aldaǵy ýaqytta Almaty óńiriniń ulttyq parkteriniń aýmaǵynda 27 mlrd teńgeden astam jeke ınvestısııa tartýdyń arqasynda taǵy osyndaı 13 vızıt-ortalyq salynady.
Týrızm salasyna ózgeris engizip jatqan álemdik trendter tabıǵattaǵy demalysqa suranysty týǵyzyp jatyr. Oǵan dálel retinde ekotýrızm, agrotýrızm, kerýen týrızmniń belsendi damýyn aıtýǵa bolady. Qazaqstan aýmaǵynyń keńdigi men ulttyq tabıǵı parkterdiń kóptigin eskere otyryp, ekotýrızm boıynsha aımaqtyń kóshbasshysy bolý múmkindigine ıe.