Elorda ákimi Altaı Kólginov jetekshi qurylys kompanııalarymen jáne bank ókilderimen kezdesti. Kezdesýge qatysýshylar osy jylǵa arnalǵan josparlardy talqylady, dep habarlaıdy Egemen.kz qala ákimdiginiń resmı saıtyna silteme jasap.
«Qalada ómir súrýge qolaıly jaǵdaı jasaý úshin turǵyn úı máselesi - erekshe nazarda. Jeńildikpen beriletin qoljetimdi turǵyn úı qurylysy, apatty ári eski úılerdi súrý, turǵyn úılerdi kúrdeli jóndeý jumystary erekshe baqylaýda.
Bıyl Memleket basshysynyń tapsyrmasyna sáıkes áleýmettik turǵyn úı qurylysynyń kólemin ulǵaıtamyz. Jetekshi qurylys kompanııalarymen jáne bankterdiń ókilderimen kezdesip, osy jylǵa arnalǵan josparlardy talqyladyq. О́tken jyly elordada rekordtyq - 3 mln sharshy metr turǵyn úı salynyp, paıdalanýǵa berildi. О́z tarapymyzdan qurylys kompanııalarymen qoıan-qoltyq jumys istep, barlyq ákimshilik kedergilerdi alyp tastaımyz, paıdasy joq deldaldardan arylamyz», dedi qala ákimi.
Ákim budan ári jańa úılerdi sýmen, kárizben jáne jylýmen qamtamasyz etý úshin JEO-3 (1-kezek, jylýmen jabdyqtaý), KOS-2 (kárizdik tazartý qurylystary) jáne NFS-3 (Sýmen jabdyqtaý) jobalaý men qurylysy júrgiziletinin málim etti.
«Qurylys kompanııalaryna qurylys sapasyn birinshi orynǵa qoıýdy, óndiris kezinde qaýipsizdikti qamtamasyz etýdi, jumysshylarǵa jalaqyny ýaqtyly tóleýdi tapsyrdym. Sondaı-aq, aýmaqtardy abattandyrý men kógaldandyrýǵa nazar aýdarý da mańyzdy», dedi Altaı Kólginov.