Premer-Mınıstr Asqar Mamın 5 aqpanda «Sıfrlyq Almaty» forýmy barysynda eldegi sıfrlyq tehnologııalardyń damýy týraly aıtty, dep jazady Egemen.kz.
–Pandemııada Qazaqstan ekonomıkasy turaqtylyqtyń jetkilikti deńgeıin kórsetti. Halyqty ınternetpen qamtý 99% quraıdy. Jalpy, onlaın rejıminde alýǵa bolatyn memlekettik qyzmetterdiń úlesi 93 paıyzǵa jetkizildi. Elektrondy saýdanyń kólemi eki esege ósti, qolma-qol aqshasyz tólemderdiń kólemi úsh esege ósti. Bes jyl ishinde barlyq oblys ortalyqtary men respýblıkalyq mańyzy bar qalalar 5G jelisimen qamtylatyn bolady, – dedi Qazaqstan premer-mınıstri.
Ol sonymen qatar ekonomıkanyń barlyq salalarynda sıfrlandyrý qarqynyn jedeldetýdi jáne halyqtyń ómirin pandemııanyń mańyzdy tendensııalarynyń biri retinde atap ótti.
Osylaısha, memlekettik ınstıtýttar sıfrlyq sheshimderdi engizýdi jedeldetti, al qashyqtaǵy formattardyń keń taralýy qoǵamnyń fýnksııalaryn turaqtandyrýǵa múmkindik berdi.
- Nátıjesinde biz sıfrlyq ekonomıka kóleminiń ulǵaıýyna kýá boldyq. Dúnıejúzilik ınstıtýttardyń málimetteri boıynsha 2020 jyly IT-tehnologııalarǵa jumsalatyn qarjy kólemi 3,9 trln dollardan asty.
Bultty esepteý naryǵy 20% ósti. 2023 jylǵa qaraı bul kórsetkish 600 mıllıard dollardan asady, dep málimdedi premer-mınıstr.