Qazaqstannyń premer-mınıstri Asqar Mamın Eýropalyq Odaqpen, Ońtústik-Shyǵys Azııa elderi qaýymdastyǵymen dıalog qurý úshin júıeli jumys júrgizý qajettiligi týraly aıtty, dep habarlaıdy Egemen.kz.
– Syrtqy suranystyń shekteýli dınamıkasy jáne satý naryqtary úshin básekelestiktiń artýy jaǵdaıynda úshinshi eldermen jáne ıntegrasııalyq birlestiktermen saýda-ekonomıkalyq qatynastardy keńeıtý boıynsha jumysty kúsheıtý qajet, – dedi Mamın Eýrazııalyq úkimetaralyq keńestiń keńeıtilgen otyrysynda.
Mamın Eýropalyq Odaqpen, Ońtústik-Shyǵys Azııa halyqtary qaýymdastyǵymen jan-jaqty aımaqtyq ekonomıkalyq seriktestik týraly dıalog qurý boıynsha júıeli jumystar júrgizý qajet ekenin basa aıtty.
Qazaqstan premer-mınıstri mundaı baılanystardy ornatý EAEO taýarlary men qyzmetteriniń syrtqy naryqtarǵa shyǵýyna jaǵdaı jasaıdy jáne ekonomıkalardyń halyqaralyq óndiristik qundylyqtar tizbegine ıntegrasııalanýyn kúsheıtedi degen pikirin bildirdi.
Kezdesý qorytyndysy boıynsha ótken baspasóz konferensııasynda QR Premer-Mınıstri Eýrazııalyq ekonomıkalyq komıssııa qazaqstandyq bastamalardy iske asyrý jónindegi is-sharalar josparyn bekitti, onda 15 negizgi mindet pen 84 is-shara anyqtaldy dep málimdedi. Bıylǵy jyly 57 is-shara (2022-2025 - 27 is-shara) júzege asyrylady dep josparlanýda.
Buǵan deıin Mamın Eýrazııalyq ekonomıkalyq odaqqa múshe elder jańa saýda kedergileriniń paıda bolýyna jol bermeýi jáne burynnan bar jaǵdaılardy joıý boıynsha jumysty kúsheıtýi kerek dep atap ótti.
Eske salaıyq, 5 aqpanda Qazaqstannyń ońtústik megapolısinde sıfrlyq Almaty forýmy, sondaı-aq EAEO úkimetaralyq keńesiniń otyrysy ótti. Oǵan Odaq elderiniń úkimet basshylary, EEK mınıstrleri, sondaı-aq EAEO baqylaýshy elderi - Moldova, О́zbekstan jáne Kýba qatysyp jatyr.
Aıta ketý kerek, Eýrazııalyq úkimetaralyq keńestiń otyrysy qatań sanıtarlyq normalardy saqtaı otyryp ótip jatyr.