«Qyzyl aımaqtan» shyqsaq ıgi

Shyǵys Qazaqstan oblysy Reseımen irgeles jatqandyqtan da, ári-beri barys-kelis kóp, ózara saýda-sattyq damyǵan. Eki el arasyndaǵy barys-kelisti, ásirese jastar jaǵy jandandyryp tur. Reseı joǵary oqý oryndaryna túsip, sonda turaqtap qalyp jatqan qazaqstandyq jastar da az emes. Kóbinese, О́skemendegi orys etnosynyń ókilderi mektep bitirgen balalaryn Reseı asyrýǵa asyǵady. Olardyń aıtýlarynsha, Reseıde shákirtaqy joǵary, ómir súrý áldeqaıda jeńil kórinedi. Sóıtip bala-shaǵasynyń sońynan ózderi de qonys aýdarýǵa tyrysady. Birjola kóship ketkender de, sińise almaı Qazaqstanǵa keri qaıtqandar da joq emes.

Bıyldyń ózinde Shyǵys Qazaqstan oblystyq Polısııa departamenti Kóshi-qon polısııasy basqarmasy 57 adamdy Qazaqstan Respýblıkasynyń azamattyǵynan aıyrýdy tirkedi. Bul aınaldyrǵan bir aıdyń ishinde ǵana tirkelgeni. Al byltyr 769 adam Qazaqstan azamattyǵynan bas tartqan. Bulardyń ishinde qos eldiń azamattyqty rastaıtyn qujatyn qaltaǵa basyp júrgender de anyqtalǵan. 2021 jyldyń alǵashqy aıynda elimizdiń «Azamattyq týraly» zańyn buzǵany úshin QR ÁQBK 496-babynyń 1-bóligi boıynsha 7 adam jaýapkershilikke tartylǵan. Iаǵnı olar eki eldiń de kýáligin qatar paıdalanyp júrgen. Mundaı zań buzýshylyqtyń aıyppuly da az emes – 100 AEK. Teńgege shaqqanda, 300 myńǵa taıaý. Atalǵan baptyń 2-bóligi boıynsha zań buzǵandar eki adam. Demek, olar belgili ýaqyt ishinde basqa eldiń azamattyǵyn alǵandyǵy týraly habarlamaǵan. Olardyń aıyp­pu­ly budan eki ese kóp. Byltyr kóshi-qon zańyn buzǵandardyń sany 55-ke jetken. Olardyń bári zań aıasynda jaýapkershilikke tartylǵan.

Shyǵys Qazaqstan oblystyq Polı­sııa departamenti Kóshi-qon qyz­meti bas­qar­masynyń basshysy Erbol Bek­paev­tyń aıtýynsha, kóbi bil­mes­tik­pen zań buzyp jatady... Al olar­dyń memlekettik qyzmetke nemese kvazı­memlekettik mekemelerde jumys iste­ýine múldem tyıym salynady.

Shyǵys Qazaqstan oblysy