Egıpet tarapynyń shaqyrýy boıynsha, 2021 jylǵy 5-7 aqpanda Egıpette jaýapty Qazaqstan-Mysyr saýda-ınvestısııalyq bıznes-forýmy ótti, oǵan 300-ge jýyq adam qatysty, dep habarlaıdy Egemen.kz
Syrtqy ister mınıstriniń orynbasary Almas Aıdarov bastaǵan qazaqstandyq delegasııany Qazaqstannyń 13 óńirinen 60-tan astam qazaqstandyq kompanııa, sondaı-aq memlekettik jáne kvazımemlekettik organdardyń ókilderi tanystyrdy. Mysyr tarapynan forýmǵa bıznes-qoǵamdastyqtyń 200-den astam ókili, sondaı-aq Mysyr Syrtqy ister mınıstriniń orynbasary Tarık ál-Ýasımı, Ońtústik Sınaı provınsııasynyń gýbernatory general Haled Fýda, Mysyr saýda palatalary Federasııasynyń basshysy Ibrahım ál-Arabı qatysty.
QR-nyń Mysyr Arab Respýblıkasyndaǵy Tótenshe jáne О́kiletti Elshisi Qaırat Lama Sharıftiń aıtýynsha, eki tarap eki el arasyndaǵy saýda-ekonomıkalyq jáne ınvestısııalyq baılanystardyń deńgeıin odan ári arttyrý úshin ózara is-qımyldyń barlyq baǵyttary boıynsha yntymaqtastyqty arttyrýǵa nıetti.
«Qazaqstan Egıpetti Afrıkanyń «qaqpasy» retinde qarastyra otyryp, Qazaqstan-Mysyr Iskerlik keńesi men saýda-ekonomıkalyq yntymaqtastyq jónindegi Úkimetaralyq komıssııanyń kómegimen eksportty ilgeriletýge daıyn.. EAEO-ǵa múshe elder men Mysyr arasyndaǵy erkin saýda týraly kelisimge qol qoıý qazaqstandyq ónim eksportyn ulǵaıtýǵa qosymsha serpin beredi, bul halqy 100 mln adamnan asatyn Mysyr naryǵyna jol ashady», dep atap ótti Qaırat Lama Sharıf.
Spıkerlerdiń aıtýynsha, ónimniń qymbattaýy jáne eki el arasyndaǵy saýda qarqynynyń baıaýlaýy memleketterdiń geografııalyq alystyǵyna baılanysty. Alaıda, QR saýda jáne ıntegrasııa vıse-mınıstri Qaırat Tórebaev atap ótkendeı, osyǵan qaramastan, Qazaqstan taýar aınalymyn 4 esege jýyq ulǵaıtýǵa múmkindigin kórip otyr.
«Bul turǵyda otandyq kompanııalar 300 mln dollarǵa jýyq somaǵa sapaly taýarlar usyna alady. Azyq-túlik qaýipsizdigin qamtamasyz etý maqsatynda mysyrlyq kompanııalar ózderiniń eksportqa baǵdarlanǵan óndiristerin Qazaqstanda ornalastyra alady. Bul baǵyt úshin mundaı jobalardy jeńildikpen kredıtteý, eksporttyq kelisimsharttardy saqtandyrý, taýarlardy tasymaldaýǵa jáne servıstik qoldaýǵa arnalǵan shyǵyndardy óteý kózdelgen. Budan basqa, jaqyn arada Qazaqstan otandyq ónimdi sheteldik satyp alýshylar úshin paıyzdyq mólsherlemeni CIRR deńgeıinde sýbsıdııalaıtyn bolady. Basqasha aıtqanda, bul kórsetkish aı saıyn negizde EYDU Hatshylyǵy belgileıtin paıyzdyq mólsherleme boıynsha sanalady», dep habarlady Qaırat Tórebaev.
Osy baǵyttaǵy jumysty jandandyrý Mysyr Syrtqy ister mınıstriniń Qazaqstanǵa aldaǵy alǵashqy resmı saparymen jáne eki el arasynda kezekti saıası jáne konsýldyq konsýltasııalar ótkizýmen baılanysty. Bul týraly óz sózinde Mysyr Syrtqy ister mınıstriniń orynbasary Tarık ál-Ýasımı aıtty.
Is-shara barysynda «Qazaqstanda jasalǵan» ámbebap kórmesi uıymdastyryldy, onda qazaqstandyq óndirýshilerdiń, onyń ishinde Afrıka qurlyǵyna eksporttaıtyn kompanııalardyń ónimderi usynyldy. Sonymen qatar, otandyq jáne mysyrlyq kompanııalar arasynda ekijaqty V2V kelissózder júrgizildi
Is-shara qorytyndysy boıynsha birqatar ekonomıkalyq qujattarǵa qol qoıyldy. Osylaısha, qazaqstandyq kompanııalar Mysyr naryǵyna 3 mln-ǵa deıin ulǵaıtý perspektıvasymen 1 mln dana kóleminde bótelkedegi sýdy jetkizý, qazaqstandyq kásiporyn ngegizinde farmasevtıkalyq dári-dármekterdi shyǵarý, sondaı-aq Qazaqstan aýmaǵynda mys ken ornyn satyp alý týraly ýaǵdalasty.
Atalǵan forým mysyrlyq bıznesmenderdiń shıkizattyq emes sektordyń qazaqstandyq taýarlaryna qyzyǵýshylyǵyn qalyptastyrýǵa yqpal ettip, otandyq taýar óndirýshiler men áleýetti mysyrlyq satyp alýshylar men ınvestorlar arasynda tikeleı baılanystardy jolǵa qoıýdy, ónimniń sapalyq jáne baǵalyq kórsetkishteri boıynsha aqparat almasýdy qamtamasyz etti. Eki el arasynda turaqty saýda mıssııalary men kezdesýlerdi ótkizý týraly sheshim qabyldandy.