Bıylǵy jyldyń basty sporttyq básekesi sanalatyn Tokıo Olımpıadasynyń bastalýyna da nebári jarty jyl ýaqyt qaldy. Dál qazirgi jaǵdaı boıynsha Qazaqstan qorjynynda Tokıo Olımpıadasynyń 42 joldamasy bar. Degenmen áli de óz ıesin tappaǵan birqatar Olımpıada lısenzııasy da bar. Byltyrǵy ǵalamdyq pandemııaǵa baılanysty Tokıo Olımpıadasyna irikteý týrnırleriniń jarys kestesine biraz ózgeris engeni barshaǵa belgili. Jýyrda Qazaqstannyń Ulttyq Olımpıada komıteti jerlesterimiz joldama úshin synǵa túsetin birqatar jarys tizimin jarııalady.
Bokstan Qazaqstan áıelder komandasy qazir múmkin bolǵan bes joldamanyń tek bireýine ǵana ıelik etýde. Qalǵan tórt lısenzııanyń taǵdyry maýsym aıynda ótetin Parıjdegi týrnırde sheshilmek. Bas bapker Erik Alǵabektiń aıtýynsha, Olımpıada salmaǵyndaǵy burymdy bes boksshy Majarstanda ótetin halyqaralyq týrnırde baq synamaq. «Keıin Túrkııada tórt memlekettiń qatysýymen birlesken jattyǵý jıynyna qatysý josparda bar. Al 5 maýsymda Parıjde álemdik irikteý týrnıri bastalady. Sol básekege 51, 57, 60 jáne 69 kılo salmaqtaǵy boksshylardy aparamyz. Ázirge, irikteý synyna naqty kimderdiń baratyny anyqtalǵan joq. Áli ýaqyt bar, bapkerlermen aqyldasa kele sheshetin bolamyz», deıdi Erik Alǵabek.
Taekvondodan Tokıo Olımpıadasynyń joldamasy Halyqaralyq federasııanyń (World Taekwondo) arnaıy reıtıngi boıynsha úlestiriledi. Iаǵnı erler men áıelder arasyndaǵy Olımpıadalyq salmaq boıynsha álemdik reıtıngte úzdik altylyqqa engen sportshylar tikeleı lısenzııaǵa ıelik etedi. О́kinishke qaraı, Qazaqstan komandasy músheleri reıtıngte altylyq qatarynan kórine almaǵandyqtan, endi olar Iordanııada ótetin qosymsha Azııa aımaqtyq irikteý týrnırinde lısenzııaǵa talasyp kóredi. Taekvondodan Qazaqstan komandasy tórt salmaqta joldamaǵa talasady. Áıelder arasynda Farıza Aldońǵarova (49 kg), Jansel Denız (+67 kg), erler arasynda Qaırat Sarymsaqov (68 kg) jáne Rýslan Japarov (+80 kg) synǵa túsedi dep josparlanýda.
Kúres túrlerinen Azııa aımaqtyq irikteý týrnıri 9-11 sáýir kúnderi Almatyda, al álemdik lısenzııalyq jarys 6-9 mamyr kúnderi Bolgarııanyń Sofııa qalasynda uıymdastyrylady. Búginde alty salmaqtyń tórteýinde joldama alǵan erkin kúres sheberleri qalǵan eki salmaqtaǵy olqylyqty toltyrýǵa nıetti. «Qazaqstan quramasynyń alǵa qoıǵan maqsaty – joldamany túgendeý. Sáýir aıynda Almaty qalasynda qurlyqtyq irikteý týrnıri men Azııa chempıonaty ótedi. Qazirgi tańda bizde erkin kúresten Olımpııa oıyndaryna tórt joldama bar. Endi qalǵan eki salmaq dárejesinde, atap aıtar bolsaq, 86 jáne 125 kıloǵa deıingi salmaqta joldamany enshilesek, Olımpıadaǵa upaıymyz túgeldenedi. Sońǵy múmkindikti qoldan jibermes úshin barymyzdy salyp, daıyndalamyz», deıdi bas bapker Áset Serikbaev.
Halyqaralyq semserlesý federasııasy (FIE) uzaq úzilisten soń Olımpııa oıyndaryna irikteý týrnırin bastamaq. Atap aıtar bolsaq, álemdik uıym jekelegen qarý túrleri boıynsha lısenzııalyq jarystardyń qaıda ótetinin málimdedi. Bas bapker Alekseı Pıssovtyń pikirinshe, qazaqstandyq shpagashylardyń lısenzııaǵa iligetin múmkindigi joǵary. «Shpagamen semserlesýden lısenzııalyq Álem kýbogy kezeńin Reseıdiń Qazan qalasy qabyldaıdy. Erler men áıelder arasyndaǵy atalǵan syn 19-23 naýryzǵa josparlanǵan. Al sáýir aıynyń ortasynda Azııa aımaqtyq Olımpıadaǵa irikteý týrnıri ótedi. Biraq bul básekeniń naqty qaı elde uıymdastyrylatyny áli anyqtalǵan joq. Sablıadan erler men áıelder arasyndaǵy Gran-prı týrnıri 10-14 naýryz aralyǵynda uıymdastyrylady. Shpagadan komanda úzdikteriniń biri Rýslan Kýrbanovtyń Tokıo oıyndaryna qatysý múmkindigin 95 paıyzǵa baǵalaımyn. Sońǵy týrnırde jaqsy óner kórsetse, lısenzııa qorjynǵa túsedi. Odan bólek, 14-15 sáýirde Ońtústik Koreıada ótedi dep josparlanǵan Azııa aımaqtyq irikteý týrnırinde sablıashy qyzdar men shpagadan Ýlıana Balaganskaıanyń joldama alatyn múmkindigi bar», deıdi Pıssov.
Nysana kózdeýden Qazaqstan quramasy jańa maýsymda birneshe týrnırge qatysýdy kózdep otyr. Al jyldyń eń alǵashqy jarysy – komandalyq eseptegi el chempıonaty. «Jospar ádettegiden asa qatty ózgergen joq. Aldymen komandalyq eseptegi Qazaqstan birinshiligin ótkizemiz. Sodan soń bizdiń sportshylardy Álem kýbogy kútip tur. Úndistandaǵy Álem kýbogy kezeńinde reıtıngke sáıkes taǵy da lısenzııalar oınatylady. Sondaı-aq Ońtústik Koreıada ótetin Álem kýbogy kezeńine shaqyrtý aldyq. Ári qaraı Tokıoda ótetin baqylaý jarysy bar. Atalǵan synǵa tek qana joldama alǵan sportshylar qatysa alady. Jańa maýsym óte qarqyndy ári jemisti ótkeli tur. Álem kýbogynyń taǵy bir kezeńi Olımpıada qarsańynda uıymdastyrylady. Bul týrnırdiń barlyǵy da Halyqaralyq federasııanyń kúntizbesinde tur. Endeshe, bári sátimen ótedi degen senimdemiz», deıdi komanda bas bapkeri Olga Dovgýn.
Stend atýdan Qazaqstan komandasy alǵashqy oqý-jattyǵý jıynyn Túrkııanyń Konıa qalasynda ótkizip, Marokkonyń Kasablanka qalasyna attandy. «Bul memlekette 9-27 aqpan aralyǵynda daıyndalyp, keıin lısenzııalyq Álem kýbogyna qatysý úshin Mysyrǵa sapar shegemiz. Kaırdegi Álem kýbogy kezeńi aqpannyń 26-sy men naýryzdyń 6-sy aralyǵynda ótedi. Álem kýbogynyń lısenzııa taratatyn sońǵy kezeńi Úndistannyń Nıý-Delı qalasynda uıymdastyrylady. Árıne, bizdiń komanda sportshylarynyń Olımpıadaǵa joldama alatyn múmkindigi bar. Birneshe sportshydan úmit kútip otyrmyz», deıdi bas bapker Sergeı Kolos.
Aıta ketelik, stend atýdan Qazaqstan komandasynyń múshesi Ásem Orynbaı joldamadan úmitti sportshylar qatarynda. Ol qańtardyń aıaǵynda ótken onlaın Azııa chempıonatynda top jarǵan bolatyn.