Jol qaýipsizdigi – bul eldiń iri shaharyndaǵy ózekti máselelerdiń biri. Bul týraly qala turǵyndarynyń aldynda esep berý kezdesýinde Almaty qalasynyń PD basshysy Qanat Taımerdenov aıtty, dep habarlaıdy Egemen.kz Polisia.kz saıtyna silteme jasap.
«Polısııa departamenti qalada jol qaýipsizdigin qamtamasyz etýge erekshe nazar aýdarýda. Bul baǵyt erekshe baqylaýǵa alynǵan. 2020 jyly júrgizilgen jumystardyń nátıjesinde jol-kólik oqıǵalarynyń sany 25,9% -ǵa azaıdy. Jábirlenýshilermen bolǵan jol-kólik oqıǵalarynyń sany 27,7% -ǵa, onyń ishinde balalarmen baılanysty 2,4 esege azaıdy», dedi Qanat Taımerdenov.
Budan soń ol ákimdik jol qozǵalysyn basqarýdy jetildirý men jol qaýipsizdigin arttyrýdyń 2021-2023 jyldarǵa arnalǵan keshendi josparyn bekitkendigin habarlady.
«Shahardaǵy apattardy azaıtý maqsatynda “Vision Zero Almaty” jobasy men Keshendi jospar aıasynda 2021 jyly 70 retteletin jáne rettelmeıtin jaıaý júrginshiler ótkelderin, sondaı-aq, 40 baǵdarsham nysandaryn salý josparlanǵan. Sonymen qatar úsh myńnan astam jol belgileri ornatylyp, aýystyrylady. Iske asyrylyp jatqan sharalar apattardyń deńgeıin 15-20% tómendetýge jáne ekologııalyq jaǵdaıdy 10% deıin jaqsartýǵa múmkindik beredi», dep qorytyndylady ol.