Soltústik Qazaqstan oblysynyń polıseıleri elevatorda qaza tapqan 36 jastaǵy jumysshynyń ólimin tergeý ústinde, dep habarlaıdy Egemen.kz Polisia.kz saıtyna silteme jasap.
9 aqpan kúni Ǵ. Músirepov at. aýdannyń polısııa bólimine shamamen saǵat 16.00-de Novoıshımskoe aýylynyń “AqNanSever” JShS elevatorynda bolǵan oqıǵa týraly habarlama kelip túsken. Dándi daqyldardy saqtaýǵa arnalǵan metall sılosty tazalaý kezinde shuńqyr paıda bolyp, 36 jastaǵy jumysshy shuńqyrǵa qulap mert bolǵan. Onyń denesi shamamen saǵat 23-te syrtqa shyǵaryldy.
Jedel-tergeý toby oqıǵa ornyn qarap, kýágerlerden jaýap aldy. О́ndiriste qaza bolý faktisi Sotqa deıingi tergep-tekserýdiń biryńǵaı tizilimine QR Qylmystyq kodeksiniń 156-baby 3-bóligi (Eńbekti qorǵaý qaǵıdalaryn buzý) boıynsha engizildi.
– Oqıǵanyń tolyq jáne obektıvti mán-jaıyn anyqtaýǵa baǵyttalǵan tergeý áreketteri júrgizilýde, – dedi aýdandyq polısııa bóliminiń bastyǵy Marat Áljanov.