Búginde jambyldyq turǵyndardy qandaı másele tolǵandyrady? Buqara men bıliktiń arasynda baılanys qanshalyqty? Berilgen ýáde oryndalyp jatyr ma? Jambyl oblysynyń ákimi Berdibek Saparbaev ótken jyldy qorytyndylap, halyq aldynda esep berdi. Onlaın-rejımde ótken jıynǵa Taraz qalasynan jáne óńirdegi aýdan, aýyldardaǵy turǵyndar tarapynan kóptegen suraq tústi.
Jıynda negizinen jergilikti jurtshylyqty jer, páter alý, kásipkerlikpen aınalysý úshin memleketten nesıe alý sııaqty máseleler tolǵandyrady eken. Sonymen qatar, jergilikti jurtshylyq ákimge túrli máseleler boıynsha da suraqtaryn qoıdy. Máselen, Taraz qalasynyń turǵyny Nurqasym Jumaev oblys ortalyǵyna qaraıtyn «Shóldala» shaǵynaýdanynyń jaryq, sý, jol máselelerin kóterdi. Berdibek Saparbaev bul úlken másele ekenin, ol máseleniń bárin sheshý úshin 2 mıllıard teńgeden astam qarjy kerek ekendigin, alaıda másele sheshimin tabatynyn jetkizdi. Sondaı-aq, Taraz qalasynyń turǵyny Quralaı Sábıevanyń «Qaladaǵy «Baryshan» alqabynan mektep salýǵa kómek berseńiz», degen ótinishine Berdibek Saparbaev bıylǵy jyly Taraz qalasynyń ózinde biraz bilim oshaǵynyń salynatynyn, alaıda «Baryshan» alqabyndaǵy salynýy tıis mekteptiń qujaty tym qymbatqa túskenin, ony qaıtaryp bergenin aıtty.
Aýdan turǵyndary da beınebaılanys arqyly oblys ákimine óz saýaldaryn joldady. Talas aýdany, Qarataý qalasynan Aıagóz Jańataı atalǵan qaladaǵy kóp ǵımarattardyń jóndeý kórmeı qańyrap turǵanyn, alaıda baspanaǵa muqtaj adamdar óte kóp ekenin jetkizdi. Bul oraıda, Berdibek Saparbaev bul máseleni sheshý úshin tıisti jumystar júrgizilip jatqanyn, aýdan ákimine tapsyrma berilgenin málimdedi. Al, Moıynqum aýdany, Qylyshbaı aýylynyń turǵyny Erkin Sabyralyuly aýyldaǵy aýyzsý, gaz máselesin kóterdi. «Oblystaǵy jalǵyz ǵana Moıynqum aýdanynda gaz joq. Sol sebepti, Shý aýdanynan Moıynqum aýdanyna gaz tartý kerek», dedi Berdibek Saparbaev. Sondaı-aq, aýyzsý máselesine oraı, tıisti basshylarǵa tapsyrma beriletinin aıtty. Sonymen qatar, Shý aýdany, Tóle bı aýylynyń turǵyny Álimqul Berdanov atalǵan aýylda gaz kirgizý qunynyń tym qymbat ekenin, tipti 500 myń teńgeniń ústine shyǵyp ketkenin aıtyp shaǵymdandy. Bul oraıda, Berdibek Saparbaev aýdan ortalyǵy Tóle bı aýylyndaǵy jaǵdaıdyń zerdelengenin, shynymen de baǵanyń sharyqtap ketkenin aıtyp, máseleniń oń sheshimin tabatynyna sendirdi. Jıynda ózge de turǵyndar ákimge kókeıde júrgen suraqtaryn qoıyp, jaýap aldy.
Jambyl oblysy