Qaraǵandy oblysynyń ákimi Jeńis Qasymbek halyq aldyndaǵy jyl saıynǵy dástúrli esebin bıyl onlaın rejiminde berdi, dep habarlaıdy Egemen.kz oblys ákiminiń baspasóz qyzmetine silteme jasap.
Aıta ketý kerek, esep berý kezdesýin oblystyń barlyq telearnalary tikeleı efırde kórsetti. Sonymen birge oblys ákimdiginiń resmı akkaýnty Instagram Akimat09, Saryarqa TV YouTube-arnasy, ekaraganda.kz saıty da onlaın-esepten aqparat taratty.
Oblys basshynyń aıtýynsha, bir aı ishinde barlyq deńgeıdegi ákimder turǵyndarmen 423 kezdesý ótkizipti. Oǵan 44 myńǵa jýyq adam qatysqan.
Atqarýshy bıliktiń aldynda turǵan maǵyzdy mindettiń biri – turǵyndardy jumyspen qamtý. Osy oraıda óńir basshysy byltyr memlekettik baǵdarlamalardyń arqasynda oblysta 35 myń jańa jumys orny ashylǵanyn málim etti. Bul jumyssyzdyq deńgeıin 4,6% kórsetkish muǵdarynda ustap turýǵa múmkindik bergen.
Onlaın-eseptik kezdesýde Jeńis Qasymbek densaýlyq saqtaý salasyn damytý máselesine keńinen toqtaldy.
– О́tken jyly Qarqaraly aýdanynyń Qaraǵaıly kentinde jáne Nura aýdanynyń Shahter aýylynda jańa aýyldyq dárigerlik ambýlatorııalar salyndy. Abaı jáne Shet aýdandarynda ortalyq aýdandyq aýrýhanalar jóndeldi. Osy jyly Aqtoǵaı men Nuradaǵy ortalyq aýdandyq aýrýhanalar da osyndaı ózgeristerdi kútip otyr. Aqadyr kentine jumys saparymen barǵanymda aqsaqaldar aýrýhana ǵımaratyn jóndeý týraly ótinish aıtty. Bıyl mindetti túrde ol jumysty bastaımyz, – dedi ol.
Sondaı-aq óńir basshysy onkologııalyq dıspanserdiń Jezqazǵandaǵy fılıalyn uıymdastyrý máselesin sheshýge ýáde berdi. Sondaı-aq Qaraǵandyda eresekterge arnalǵan oblystyq kópbeıindi aýrýhananyń, oblystyq onkologııalyq dıspanserdiń operasııalyq-reanımasııalyq korpýsynyń qurylysy bastalǵanyn atap ótti. Sáýlelik dıagnostıka jáne terapııa ortalyǵy úshin ǵımarat salý josparda bar. Uzaq ýaqyt kidiristen keıin oblystyq balalar aýrýhanasynyń qurylysyn aıaqtaý da kezek kúttirmeıtin mindettiń biri ekenin tilge tıek etti.
– Jıhazben jáne qajetti turmystyq tehnıkamen jabdyqtalǵan qyzmettik páterlerdi berý esebinen dárigerler men jas mamandardy tartý máselesin sheshemiz. Eki jyl ishinde 227 dáriger baspanamen qamtyldy. Aldaǵy eki jylda bizdiń oblysqa jumys isteýge kelgen kem degende 300 maman páter alady, – dedi ol.