Onlaın-eseptik kezdesýde oblys ákimi Jeńis Qasymbek óńirde aýqymdy qurylys jumystarynyń jalǵasatynyn málimdedi, dep habarlaıdy Egemen.kz oblys ákiminiń baspasóz qyzmetine silteme jasap.
Bıyl kezekte turǵan 3 myńnan astam adam áleýmettik turǵyn úımen qamtamasyz etilmekshi. Budan bólek áleýmettik qorǵalatyn sanattaǵy kezekte turǵan 2 500 adam da baspanaly bolǵan. Jeńis Qasymbek áleýmettik jalǵa beriletin jáne nesıelik turǵyn úı berý qarqyny bir jylda 40%-ǵa óskenin atap ótti.
Oblys ákimi Qaraǵandy oblysynda 2021 jyly 14 jańa óndiristi iske qosyp, 2 600 jumys ornyn ashýdyń josparda bar ekenin aıtty. Al ınvestısııa kólemi 700 mlrd teńgeden asady degen boljam bar.
Jaqyn arada Jáıremdegi baıytý fabrıkasy, ferroqorytpa zaýyty jáne Qaz Carbon aglomerasııalyq fabrıkasy sııaqty jobalardy júzege asyrý josparda bar eken. Saran qalasynda qytaılyq Yutong kompanııasynyń qatysýymen avtobýstar men arnaıy tehnıka shyǵaratyn kásiporyn iske qosyldy jáne jaqyn arada shaǵyn torapty qurastyrý iske qosylatyn bolady. Sondaı-aq, bıyl reseılik «Tatneft» kompanııasynyń qatysýymen shına shyǵaratyn zaýyttyń qurylysy bastalatynyn habardar etti oblys ákimi.
Qaraǵandy oblysynda bıyl kásipkerlikti qoldaýdy qarjylandyrý 2,5 ese ósken eken.
– 2020 jyly «Bıznestiń jol kartasy» boıynsha jeńildikti sharttarmen oblystyń 420 kásiporny óńir ekonomıkasyna 48 mlrd teńge salyp, óz jobalaryn iske asyra aldy. Bul 2019 jylmen salystyrǵanda eki ese kóp. Bıyl kásipkerlikti qoldaýǵa bıýdjette 7 mlrd teńge qarastyrylǵan. Ol ótken jylǵydan 2,5 ese artyq, – dedi oblys ákimi.
Shaǵyn jáne orta bıznesti memlekettik qoldaý 2 400 turaqty jumys ornyn qurýǵa múmkindik bergen. Bir jyl ishinde óz isin ashýǵa 1900 óteýsiz grant berilipti. Oblys ákiminiń júz grantyn jas kásipkerler aldy. Sondaı-aq túrli memlekettik baǵdarlamalar boıynsha qarjylyq qoldaýdy 3700 kásipker paıdalanǵan. Bızneske tegin oqytý kýrstarynan 2 800 adam ótti.