Qaraǵandy qalasyndaǵy Nazarbaev Zııatkerlik mektebiniń oqýshylary ózderiniń bilim salasyndaǵy jetistikterimen únemi qýantyp júredi. Taıaýda atalǵan bilim mekemesinen taǵy da jaǵymdy jańalyq jetti.
Atalǵan mekteptiń 12-synybynda oqıtyn Gúlsim Ázirahmet pen Ulan Qundyzbaı Ábý-Dabıdegi Nıý-Iork ýnıversıtetiniń tolyq grant ıegerleri atanypty. Bul oqý ornynda olar ınjenerlik sala boıynsha bilim alatyn bolady.
Avıasııa ınjeneri mamandyǵyn tańdaǵan Gúlsim bolashaqta áýe apattarynyń aldyn alýǵa kómektesetin júıeni qurýdy arman etedi. Ol óziniń bakalavrıatta alǵan bilimi ushaqtyń qurylymyn jáne avtomattandyrylǵan júıelerdi qurý algorıtmin túsinýge kómektesetinine senimdi.
Al Ulannyń tańdaýy fızıkaǵa tústi. Nıý-Iork ýnıversıtetinde ol osy saladaǵy bilimi men daǵdylaryn tereńdetkisi keledi.
– Injener bolǵym keledi, deıdi talapty jas. – Árıne ýnıversıtette naqty salany tańdaıtyn bolamyn. Injenerııa qoǵam úshin mańyzdy, óıtkeni ınnovasııalar men ónertabystar adamdardyń ómirin jeńildetedi jáne adamzattyń damýyn alǵa jyljytady.
Ábý-Dabıdegi Nıý-Iork ýnıversıtetiniń fılıaly 2010 jyly ashylǵan. Qazirdiń ózinde abyroı men bedel jıyp úlgergen bul oqý orny jyl saıyn dúnıe júzi boıynsha daryndy stýdentterdi izdeıdi jáne olarǵa túrli stıpendııalar men granttar túrinde qarjylyq qoldaý kórsetip otyrady.
QARAǴANDY