Atyraýda ózgeniń múlkin jymqyryp ketken eki jigit jábirlenýshige 477 myń teńgeniń materıaldyq zalal keltirdi, dep habarlaıdy Egemen.kz.
Oblystyq polısııa departamenti baspasóz qyzmetiniń málimetinshe, urlyq «Nursaıa» shaǵyn aýdanyndaǵy úılerdiń birinde bolǵan.
«Polısııa qyzmetkerleri turǵyn úıdiń esigin buzyp kirgen urylar 14 dana jylytý batareıasyn, 1 dana perforatory men 250 metrlik kabeldi qol etkenin anyqtady. Tártip saqshylary atalǵan urlyqqa qatysy bar eki kúdiktini vıdeokameranyń kómegimen bir kúnde ustady. Kúdiktiler – Atyraý qalasynyń 32 jáne 31 jastaǵy turǵyndary. Urylar jábirlenýshi azamatqa 477 myń teńge kóleminde materıaldyq zalal keltirgen» dep habarlady departamenttiń baspasóz qyzmeti.
Qazir kúdiktilerge qatysty QR Qylmystyq Kodeksiniń 188-baby, 3 bóligimen sotqa deıingi tergeý bastaldy.