Bilim jáne ǵylym mınıstri Janseıit Túımebaev elimizge arnaıy saparmen kelgen Brıtanııa úkimetiniń halyqaralyq saýda jáne ınvestısııa jónindegi arnaıy ókili Iork gersogy hanzada Endrıý Albert Krıstıan Edvard Vındzorskıımen kezdesti.
Mártebeli meıman osy júzdesý aldynda bıyl alǵashqy talapkerlerdi qabyldaıtyn Astananyń jańa ýnıversıtetinde bolyp, oqý ornynyń daıyndyǵyn, zaman talabyna qaraı jabdyqtalyp jatqan kabınetterdi aralap kórdi. Bul ýnıversıtettiń álemdegi tańdaýly joǵary oqý oryndary sanatynda bolatynyna senim bildirdi. Osy arada Otanymyzdaǵy bolashaǵy zor bul bilim ordasy Londonnyń ýnıversıtettik kolledjiniń seriktestigimen ashylyp jatqanyn nazarǵa sala ketsek deımiz.
О́z kezeginde mınıstr Iork gersogyna elimizdiń bilim berý júıesindegi irgeli ózgeristeri men qol jetken jetistikteri týraly aıta kelip, munyń bári Elbasy Nursultan Nazarbaevtyń aıryqsha mán berýiniń arqasynda júzege asyp jatqanyn jetkizdi. Sonymen qatar, Qazaq eli eýropalyq bilim keńistigine múshe bolyp qabyldanǵanyn, ıaǵnı Bolon prosesine qosylǵanyn atap ótti. “Bolashaq” baǵdarlamasy boıynsha dúnıe júziniń eń úzdik oqý oryndarynda ár jyl saıyn úsh myń jastyń bilim tolyqtyryp jatqanyn, olardyń myńnan astamy Anglııada oqyp júrgenin nazarǵa saldy. Kásiptik jáne tehnıkalyq bilimdi damytýdyń 2008-2012 jyldarǵa arnalǵan memlekettik baǵdarlamasy aıasynda iske asqan tirlikter týraly, mamandardyń biliktiligin arttyrý jáne qaıta daıarlaý boıynsha Ulybrıtanııanyń kolledjderimen baılanystyń jaqsy ornaǵanyn, stýdentter almasý, oqytýshylardyń praktıkadan ótýi, ozyq tehnıkalardy oqyp úırený birlikte júrgizilip kele jatqany da alǵa tartyldy.
Súleımen MÁMET.