Jahandyq indetpen jan ushyra alysqan aq halatty abzal jandarǵa qandaı qurmet kórsetse de laıyqty. Aýyr dertpen arpalysqan dárigerlerdiń qurmetine oraı Ulttyq mýzeıde «Jaqsy dáriger» atty fotokórmeniń ashylý saltanaty men «Batyrlar óz ortamyzda» kitabynyń /white book/ tusaýkeser rásimi ótti.
Aıtýly jıynǵa muryndyq bolǵan «Sultan MAGAZINE» respýblıkalyq qoǵamdyq-saıası, aqparattyq-tanymdyq jýrnaly.
Kórmeniń saltanatty ashylý rásiminde betashar sózdi Densaýlyq saqtaý mınıstri Alekseı Soı aldy.
«Búgingi kórme men «Batyrlar óz ortamyzda» atty kitaptyń tusaýkeserin Táýelsizdiktiń 30 jyldyǵyna oraılastyrý – óte jaqsy ıdeıa. Sebebi qınalǵanda kómek surap, aýyrǵanda shıpa izdep aldyna barǵan kez kelgen naýqasqa qoldaý kórsetetin, ómirlerine qaýip tóngen sátte arasha túsip, tipti keıde ekinshi ret ómir syılap jatatyn dárigerlerimizge qandaı qurmet kórsetsek te laıyq», dedi A.Soı.
Odan keıin sóz alǵan Koreı Respýblıkasynyń Qazaqstandaǵy Tótenshe jáne ókiletti elshisi Ký Hong Sok pen Parlament Májilisiniń depýtaty, «Aqjol» demokratııalyq partııasynyń jetekshisi Azat Perýashev medısına qyzmetkerleriniń jaǵdaıyn jasap, olardyń eńbegin baǵalaýdyń erekshe mańyzǵa ıe ekendigin atap ótti.
Izgi lebizderden keıin Táýelsizdigimizdiń 30 jyldyǵyna arnalǵan «Batyrlar óz ortamyzda» kitabynyń lentasy qıyldy. Atalmysh kórmege «live» formattaǵy 200-den asa fotosýretter usynyldy. Ekspozııasııalanǵan ár sýretten medısına mamandarynyń meıirimdi kózqarasy men tynymsyz eńbeginiń anyq beınesin kórýge bolady.