Búgin Aqparat jáne qoǵamdyq damý mınıstrliginiń bastamasymen Qazaqstan Táýelsizdiginiń 30 jyldyǵyna oraı «Balapan» telearnasynyń janynan «Erekshe bilim berý qajettilikteri bar balalarǵa arnalǵan áleýmettik anımasııa mektebi» óz jumysyn bastady, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Arnaıy joba Ortalyq Azııada alǵash ret júzege asyrylýda. Mektep oqýshylaryna Qazaqstannyń, Japonııanyń, Ońtústik Koreıanyń úzdik mýltıplıkatorlary dáris oqıdy.
Mektep erekshe bilim alý qajettilikteri bar balalardyń áleýmettik beıimdelýine yqpal etetin jańa daǵdylardy úırenýge jáne qabiletterin arttyrýǵa múmkindik beredi. Uıymdastyrýshylar áleýmettik qoldaýdan basqa, televızııalyq dızaın salasynda suranysqa ıe mamandardy oqytýdy jáne úzdik túlekterdiń bolashaqta jumysqa ornalasýyna múmkindik jasaýdy kózdeıdi.
«Balapan» telearnasy janyndaǵy mekteptiń taǵy bir ereksheligi, jasóspirimder oqýdan keıin qalyptasqan eresek mamandardan keńes pen qoldaý ala alady.
Jobaǵa qatysý úshin 14-16 jas aralyǵyndaǵy 30 bala iriktelip alyndy, olar 2021 jyldyń naýryz-tamyz aılarynda onlaın-formatta oqýdan ótetin bolady.
Oqýdyń birinshi aıynda balalar anımasııa negizderi boıynsha jalpy dáris oqıdy dep josparlanýda. Ári qaraı qyzyǵýshylyǵy men beıimine qaraı birneshe topqa bólinip oqytylady.
Oqýǵa túsýdiń negizgi talaptary — balalardyń oqýǵa degen yntasy men qyzyǵýshylyǵy, jasóspirimderdiń shyǵarmashylyq áleýeti.
Sonymen qatar anımasııa salý adamǵa fızıkalyq turǵyda kúsh túsirmeıdi.
Búgingi tańda Qazaqstanda anımasııalyq dızaın salasy qarqyndy damyp keledi.
Oqý kýrsy tegin jáne jeke anımasııalyq stýdııalardyń atsalysýymen qaıyrymdylyq joba retinde júzege asyrylady.
«Qazaqstan» teleradıokorporasııasy balalarǵa oqý úshin qajetti arnaıy planshetter men basqa da tehnıkalyq quraldarmen qamtamasyz etetin bolady.