Qazaqtyń kórnekti memleket jáne qoǵam qaıratkeri Turar Rysqulov 1920 jyly 21 qańtarda Túrkistan Ortalyq atqarý komıtetiniń tóraǵasy bolyp saılanǵany tarıhtan belgili. Bul ólkede keńestik bılik ornyǵyp, bolshevıkter ústemdigi jańadan qalyptasa bastaǵan zaman. Basshylyq qyzmetti qabyldaǵanyna týra eki aı tolǵan tusta T.Rysqulov, ıaǵnı 1920 jyldyń 20 mart (naýryz) kúni «Kóktem shýaǵy – Naýryz» merekesin atap ótý jaıly №456 buıryq shyǵarǵan eken.
Baspasóz betterinde bul qujatty jambyldyq qalamger-jýrnalıst marqum Maqulbek Rysdáýlet taýyp, 2009 jyly oblystyq gazet betine jarııalaǵany týraly aıtylyp júr. Qalaı desek te, bul jádiger – halqymyzdyń ejelden kele jatqan ǵuryptyq merekesi Naýryz meıramyn ótken ǵasyr basynda saqtap qalý úshin qabyldanǵan resmı qujat. Sondyqtan da bolar, turartanýshylar bul qujatty, birinshiden, halqymyzdyń baıyrǵy qundylyǵyn saqtap qalý jolynda jasalǵan úlken qadam dep túsinse, ekinshi jaqtan, úlken qaıratkerdiń qalam izi túsip, qoly qoıylǵan estelik dep qaraıdy.
Zertteýshi Ordaly Qońyratbaev bir suhbatynda atalǵan buıryqty erterekte Tashkent arhıvinen kezdestirgenin, kóshirmesi ózinde saqtaýly turǵanyn aıta otyryp, T.Rysqulov Túrkistan Ortalyq atqarý komıtetiniń tóraǵasy bolyp turǵan tusta túrki halyqtarynyń tilin memlekettik til dep jarııalaý týraly másele kóterip, sonymen qatar Naýryzdy dinı mereke dep qarsy shyqqandarǵa óz ýájin usynyp, «Naýryz – kóktem merekesi, halyq ózi báribir toılaıdy. Biz resmı uıymdastyrsaq, halyq ta jyly qabyldaıdy», dep túsindirgen deıdi.
Joǵarydaǵy buıryqtyń nátıjesinde, Ortalyq Azııada alǵash ret 1920 jyly naýryzdyń 22-si kúni Naýryz memlekettik mereke retinde Túrkistan Respýblıkasynyń aýmaǵyna qarasty qalalarda, ýezderde, aýyldarda atap ótilgen.