Jer paıdalanýshylardyń kim ekenin jerdiń naqty ıesi — halyq bilýi shart. Bul týraly Qazaqstan fermerler qaýymdastyǵynyń tóraǵasy Jıgýlı Daırabaev aıtty, dep habarlaıdy Egemen.kz
«Jer sheteldikterge berilmesin dep dabyl qaǵyp júrgende, qazirgi jer paıdalanýshylardyń Qazaqstan rezıdenttiginen shyǵyp, shetel azamattyǵyn alyp jatqanyn baıqamaı qaldyq. О́kinishke qaraı, faktiler bar, jaqyn arada tıisti materıaldardy komıssııa nazaryna usynamyz. Shetel azamattyǵyn alyp jatqandar qolda bar myńdaǵan gektar jer telimderin bankke kepilge qoıyp, qyrýar aqsha alyp, keıin qaıtara almaı, shetelge qashyp ketpeýine kim kepil? Zań keri kúshine ıe bola almaıdy degen kertartpalyqty qoıyp, tıisti mehanızmderdi qarastyrǵan abzal», dedi J. Daırabaev.
Sonymen birge, qaýymdastyq tóraǵasy jerdi jalǵa alǵandardyń ashyq tizimi bolýy keregin aıtty.
«Tipti, jer paıdalanýshy zańdy tulǵalardyń quryltaıshylarynyń kim ekenin, qaı jerdiń azamaty ekenin jerdiń naqty ıesi – halyq bilýi shart. Prezıdentimiz halyqqa jasaǵan sońǵy Joldaýynda qoǵamdyq baqylaý rólin kúsheıtý kerek dep qadap aıtty. Sondyqtan «Eldiń kózi - elý» degen prınsıpti jer máselesine de paıdalanýymyz kerek», dedi spıker.