Juqpaly indettiń taralýy jóninen «sary aımaqta» turǵan Almaty oblysyndaǵy epıdemııalyq ahýal asqynyp bara jatqandaı. О́ıtkeni, ótken bir táýlikte óńirde 104 adamnyń koronavırýs juqtyrǵany anyqtalǵan. Osylaısha oblys el boıynsha anyqtalǵan naýqastar sany boıynsha Almaty qalasy men Nur-Sultan qalasynan keıingi orynǵa shyǵyp otyr, dep habarlaıdy Egemen.kz
Sanıtarlyq qyzmettiń baǵamdaýynsha, indet juqtyrýshylar sany adamdar jıi shoǵyrlanǵan qalalar men Almaty mańyndaǵy aýdandarda kóbeıgen eken. Máselen, Taldyqorǵan men Tekeli qalalarynda 13 jaǵdaı tirkelse, megapolıspen shekaralas jatqan Talǵar aýdanynda - 12, Ile aýdanynda – 11, Qarasaı aýdanynda – 10, Eńbekshiqazaq jáne Jambyl aýdandarynda 9 turǵynnan koronavırýs tabylyp otyr. Budan bólek Panfılov aýdanynda 8 naýqas, Kóksýde aýdanynda 6 naýqas, Eskeldi aýdanynda 4 naýqas, Qaratal jáne Raıymbek aýdandarynda da 3 naýqas dárgerlerdiń kómegine júgingen. Sondaı-aq, indet belgisi anyqtalǵan naýqastarmen baılanysta bolǵan taǵy 383 adam anyqtalyp, olardyń barlyǵy úı karantınine jatqyzylǵan. Qazir oblystyń medısına mekelerinde 1053 naýqas em qabyldaýda. О́kinishke qaraı 25 naýqastyń jaǵdaıy aýyr eken. Al sońǵy birer kúnde dárigerler 18 naýqasty emdep shyǵarypty.
Jalpy, juqpaly indettiń jappaı taralýynyń aldyn alý maqsatynda aımaqta birqatar shekteýler engizilgen bolatyn. Alaıda, ótken táýlikte tirkelgen naýqas sanynyń kúrt kóbeıýi qosymsha karantın engizý máselesin kún tártibine shyǵaryp otyr. Bul týraly óńirdegi epıdemııalyq ahýalǵa oraı ótken baspasóz máslıhatynda oblys ákiminiń orynbasary Batyrjan Baıjumanov ta aıtty.
- О́tken bir táýlikte 104 adamnyń koronavırýs juqtyrǵany anyqtalyp otyr. Mamandar indet taralýynyń sharyqtaý shegi sáýir aıynyń alǵashqy kúnderine tuspa-tus keletinin aıtýda. Demek, karantın shekteýlerin qatańdatýǵa qatysty qosymsha sheshim qabyldaýymyz kerek. Vırýstyń taralýyn toqtatý úshin biz turǵyndardan adamdar kóp jınalatyn oryndarǵa barýdan múmkindiginshe bas tartyp, úıde bolýdy jáne syrtqa shyqqanda betperde taǵyp, áleýmettik qashyqtyqty qatań saqtaýdy suraımyz, - dedi oblys ákiminiń orynbasary Batyrjan Baıjumanov.
Al aımaqta jappaı vaksınasııalaýdyń ekinshi kezeńi qarqyndy júrip jatyr. Osy maqsatta reseılik «Spýtnık V» ekpesiniń 11 350 dozasy jetkizilgen. Búginde koronavırýs ınfeksııasyna qarsy vaksına salý óńirdegi 30 egý pýnktinde júrgizilýde. Qazirge deıin 6883 adamǵa ekpe jasalǵan eken.
- Vaksına – koronavırýs juqtyrǵan jaǵdaıda, derttiń asqynyp ketýinen qorǵaıdy. Nátıjesinde adamdarǵa aýrýhanaǵa jatýdyń qajeti shamaly bolady. Iаǵnı, ekpe saldyrý – aǵzanyń qorǵanys qabiletin nyǵaıtady, - deıdi bul jaıynda oblystyq densaýlyq saqtaý basqarmasynyń basshysy О́mirzaq Nııazbekov.
Aıtpaqshy, oblystyń medısınalyq uıymdary juqpaly indetpen kúresýge qajetti jabdyqtarmen jáne dárilik preparattarmen tolyqtaı qamtamasyz etilgen eken. Búginde ınfeksııalyq stasıonardaǵy tósekter sany 412 orynǵa deıin kóbeıtilip, olardyń jalpy sany 1 550 birlikke jetkizildi. Indettiń taralýyna jol bermeý men erte anyqtaý maqsatynda da jumys júrip jatyr. Jyl basynan beri óńirde jumys istep turǵan 11 PTR-zerthanasynda 137 myń adam test ótkizip, tekserilgen kórinedi.