Adamzattyq órkenıettiń altyn besigine aınalǵan Uly dala ıeleriniń tól merekesi – áz-Naýryz! Qart tarıhtyń kórikti kerýeni túrki jurtyna jyl aınalyp turaqtaǵan sátte kóktemniń kórkem keıpi jan elitip, meıirim sebedi. Mundaı izgilikke boıyn jylytqan qazaq halqynyń jańa tynysy ashylyp, dástúrin dáripteıtin ádeti. Baba mırasyn kókke kótergen qaraorman qarashany syrttan baqylasańyz, tatýlyqpen tynystap, birlikke tutqa bolyp turǵandaı. Oǵan osy sýret dálel.
«Naýryz» kartınasynyń ıesi – belgili qylqalam sheberi Dáýren Makın. Ulttyq qundylyqtarymyzdy kenep betine keskindegen sýretshiniń eńbegi júrekke jyly tıedi. Nege deseńiz, ǵulama ǵurpymyzben tynystap turǵan kartınanyń ishinde qazaqtyń baıyrǵy bitim-bolmysy, tynys-tirshiligi qonystanǵan. Qytymyr qystan mal-jany aman shyqqan halyqtyń kóktemniń alǵashqy merekesimen qaýyshqan sáti ár túrli tústermen aıshyqtalyp, oqyrmannyń qııalyna qanat bitirip tur.
Sýretshi turmystyq janrda oryndalǵan kópbeıneli kartınasy arqyly qazaq halqyna tán salttyq obrazdardy beınelegen. Ulystyń uly kúnin toılaýǵa bet alǵan qarapaıym adamdardyń kóńil kúıi, lala lebizi, bir-birine degen saǵynyshy kózge ottaı basylady. Bes myń jyldan astam ýaqyttan beri toılanyp kele jatqan jyldyń basty meıramyn qarsy alǵan aýyl halqynyń turmysy kenep betine ádemi ornalasqan. Quddy sýret sóılep turǵandaı kúı keshesiz.
Áz-Naýryz – tabıǵattyń jańarý merekesi, jyldyń basy, armandarǵa umtylys jasaıtyn mezet. Atalǵan merekege halyqtyń jappaı qatysyp, erekshe atap ótetini ámbege aıan. Jastar altybaqan qasyna jınalyp, án salyp, bı bıleıdi. Ulttyq oıyndar nasıhattalyp, kúsh synasady. Jalyndy jigitter arasynda kúres pen báıge jarystary uıymdastyrylyp, aqyndar aıtysady. Osyndaı ultqa tán ıgilikterdiń bári kartınada oryn alǵan. Sýret kompozısııasynyń ereksheligi osynda.
Uzaq ýaqyt kórispegen aqsaqaldar áńgime-dúken qursa, aq jaýlyqty ájeler kelinderge naýryz kóje jasaýdy úıretip jatyr. Atqa mingen bozbalalar sulýlarǵa qaraı jaqyndaı túsip, tanysýǵa oqtalýda. Asyq oınaǵan balalardyń qam-qareketi qyzyq ta kúlkili. Sýretten mereke, saýyq-saıran, tilektestik tynysy anyq baıqalady.