«Ertis ormany» rezervatyna túlkiler qaıta oralyp jatyr. Budan biraz ýaqyt buryn erekshe qorǵalatyn qaraǵaı alqaptarynda túz taǵylary kórinbeı ketken eken.
Memlekettik orman tabıǵı rezervatynyń aýmaǵynda ǵylym bóliminiń mamany ormanda túlkini fotoǵa túsirip alǵan.
«Túz taǵysynyń qaıta oralýy ekojúıede qolaıly jaǵdaılar qalyptasyp otyrǵanyn bildiredi. Ári orman júıesiniń qolaıly jaǵdaıynyń mańyzdy kórsetkishi. Bul jyrtqyshtar kemirgishterdiń sanyn rettep, tabıǵı tepe-teńdikti saqtaýda erekshe ról atqarady», deıdi mekeme mamandary.
Ormanshylardyń aıtýynsha, túlki – eń aqyldy ári beıimdelgish jyrtqyshtardyń biri. Estý qabileti óte jaqsy jetilgen, tipti qar astyndaǵy bolmashy sybdyrdyń ózin ańǵaryp, jemtiginiń ornyn dál anyqtaı alady. Qysta terisiniń qylshyqtary burynǵydan da úlpildep, tyǵyz bola túsedi eken. Bul ony kez kelgen qaqaǵan aıazdan senimdi qorǵaıdy.
Mamandar «Ertis ormanynyń» jabaıy tabıǵatynyń sonshalyqty baı ári alýan túrli ekenin, oǵan turǵyndar uqyppen, janashyrlyqpen qaraý mańyzdy ekenin aıtady. Buǵan deıin orman aýmaǵynda appaq reńdegi jońǵar atjalmany (Phodopus sungorus) da kózge túsken. Bul janýardyń orman alqabynda kezdesýi de erekshe jaıt dep tanylyp otyr.
Pavlodar oblysy