Túrkistan qalasynyń mádenı-rýhanı ortalyǵynda ornalasqan «Kerýen saraı» týrıstik kesheninde álemde teńdesi joq ushatyn teatr ashylady. Qaladaǵy qurylys alańdaryn aralaǵan oblys ákimi О́mirzaq Shókeev demalys ortalyǵynyń ashylýǵa daıyndyq barysymen tanysty, dep habarlady Túrkistan oblysy ákiminiń baspasóz qyzmeti.
«Joba avtorlarynyń aıtýynsha, qııal-ǵajaıyp ortalyq Samuryq qustyń jumyrtqasy halyq ańyzyna negizdelgen. Báıterektiń butaǵyndaǵy uıasyna kelip, kıeli Samuryq qus kún beıneli altyn jumyrtqa salady. Dál osy altyn tústi alyp jumyrtqa kelbetindegi erekshe teatrda báıteregimiz sııaqty sıqyrly ertegiler eline, qazaq halqynyń tarıhyna jańa tehnologııalardyń kómegimen, 8 D formatta áserli saıahat jasaýǵa bolady. Elimizdiń ótkeni, búgingisi men kelesheginiń kórinisi osy teatr-mýzeıde kórsetiledi. Shyǵys úlgisinde salynǵan keshen kıeli shaharǵa keletin meımandardyń súıikti demalys ornyna aınalary sózsiz», delingen habarlamada.
Túrkistan qalasynyń ákimshilik iskerlik ortalyǵy (ADS) aýmaǵynda ákimshilik ǵımarattar men kópqabatty 24 úıdiń qasbetterin bir úlgide jaryqtandyrý jumystary júrgizilýde. Qaladaǵy ǵımarattardyń aınalasy kógaldandyrylyp, jaryqtandyrylýda. Qalanyń basty kóshelerinde túngi jaryqtandyrý jumystary júrgizildi. Sondaı-aq Iаsaýı kesenesiniń aldynda erekshe jaryqshamdar ornatyldy. Mınskiden arnaıy aldyrylǵan aǵash keıpindegi baqsha jaryqshamdary túnde aınalany san alýan túske bólese, kúndiz salqyn sý shashyp, aptap ystyqtan qorǵaıtyn bolady.