Memleket basshysy 2026 jyldy Sıfrlandyrý jáne jasandy ıntellekt jyly dep jarııalady. Osyǵan oraı elordada aldaǵy 3–4 sáýir kúnderi ekinshi «International Legathon MaxUP» zań salasyndaǵy keıs-chempıonaty ótedi. Mazmundy is-sharany Maqsut Narikbayev University (MNU) AHQO Soty, Baker McKenzie jáne «Kazakhstan Bar Association» qoldaýymen uıymdastyrady. Saıystyń taqyryby «Bolashaq quqyǵy» dep atalady. Baıqaýǵa 13 elden 90-nan astam stýdent qatysady.
Olardyń qatarynda Makgıll ýnıversıteti (Kanada), Qytaı saıası ǵylymdar jáne quqyq ýnıversıteti (Qytaı), Bremen ýnıversıteti (Germanııa), Baký memlekettik ýnıversıteti (Ázerbaıjan), «Joǵary ekonomıka mektebi» ulttyq-zertteý ýnıversıteti (Reseı), Malaııa ýnıversıteti (Malaızııa) jáne Tashkent memlekettik zań ýnıversıteti (О́zbekstan) sııaqty joǵary oqý oryndarynyń komandalary bar. Baıqaýǵa qatysýshylardyń jobalaryn memlekettik organdardyń ókilderi men halyqaralyq quqyq salasynyń mamandary jáne jasandy ıntellekt salasyndaǵy sarapshylar baǵalaıdy.
«Prezıdent elimizdi úsh jyl ishinde tolyq sıfrlyq memleketke aınaldyrý jóninde strategııalyq maqsat qoıdy. Osy turǵyda bilim salasy sheshýshi rólderdiń birin atqarýǵa tıis dep esepteımin. Biz tek álemniń úzdik zańger stýdentteri básekelesetin alań ǵana emes, sonymen qatar taıaý bolashaqta betpe-bet keletin sıfrlyq dáýirdiń syn-qaterlerine jaýap beretin úzdik quqyqtyq sheshimder men retteýshi modelderdi qalyptastyratyn format qurdyq», dedi MNU Basqarma tóraǵasy Talǵat Nárikbaev.
Sondaı-aq is-sharaǵa qatysýshylar jańa tehnologııalardyń zań júıesine, quqyq qaǵıdattaryna, etıka men adam quqyqtaryna áserin zertteıdi. Halyqaralyq saıys ýnıversıtettiń jasandy ıntellekt salasyndaǵy alǵashqy jobasy emes. Buǵan deıin MNU eki JI zerthana ashyp, «AI+X» jańa bilim baǵdarlamasy men óz túlekterine arnalǵan jasandy ıntellekt boıynsha tegin kýrsty iske qosty.
Aıta keteıik, alǵashqy «International Legathon MaxUP» keıs-chempıonaty byltyr ótken bolatyn.
Jalǵas AZǴANBAEV