Atyraýda sý eseptegish quraldaryn shyǵaratyn zaýyttyń qurylysy bastaldy.
Jańa zaýyt Mahambet aýdanyndaǵy Sarytoǵaı aýylynda salynady.
Sheteldik qurylǵylarmen jabdyqtalatyn zaýytta bolashaqta aıyna 18 myń danadan astam sý eseptegish qurylǵylary shyǵarylady.
«Qazirgideı kúrdeli kezeńde biz úshin jumys orny men óndiris oshaǵy mańyzdy. Sý eseptegish quraldaryn shyǵaratyn zaýyt – Mahambet aýdanynda boı túzeıtin alǵashqy óndiristik oryn. Ekonomıkaǵa paıdaly mundaı jobalardy kóbeıtý aldaǵy ýaqytta da jalǵasady» dedi oblys ákimi Mahambet Dosmuhambetov.
Jańa zaýytta 80 adam jumysqa tartylady. Onyń 60-tan astamy Mahambet aýdanynan alynady. Solardyń qatarynda Sarytoǵaı aýylynyń turǵyny Azamat Sultashev ta bar. «Buǵan deıin Teńiz kenishinde jumys istep keldim. Aýylymyzda otandyq ónim shyǵaratyn zaýyt ashylatynyn estip, osynda aýystym. Munda menimen birge aýyldastarym da jumys isteıdi. Arnaıy oqý kýrsynan óttim» deıdi ol.
Al, «Guryev» JShS-niń dırektory Jeńis Bekbasarovtyń aıtýynsha, bul - Qazaqstandaǵy otandyq eseptegish quraldaryn shyǵaratyn alǵashqy kásiporyn. Qajetti shıkizattar elimizden ákelinedi. Ári ekologııalyq turǵydan qaýipsiz bolady. Alǵashqyda zaýyt oblys kásiporyndarynyń suranysyn qamtamasyz etedi. Keıin ózge óńirlerge suranyspen jiberiledi.
«Sý eseptegish quraldary shetelden jetkizilip jatyr. Sondaı-aq shetelden ákelingen bólshekteri qurastyrylady. Sondyqtan bul zaýyt elimiz úshin óte paıdaly óndiris bolady dep kútilýde. Bastapqyda munda mehanıkalyq eseptegish quraldar, keıin elektrondy túrleri shyǵarylady. Munyń tıimdiligi aı saıyn sýdy qansha tutynǵanyn qurylǵy avtomatty túrde esepteıdi. Osy oraıda, muny elimizde júrgizilip jatqan aqparatty tasymaldaý júıelerin sıfrlandyrýǵa da septigi tıetin erekshe joba deýge bolady», dedi Jeńis Bekbasarov.
Zaýyt basshylyǵy eki kompanııamen memorandýmǵa qol qoıdy. Atalǵan zaýyt qurylysy aldaǵy qyrkúıekte aıaqtalyp, óndiristik jumysy bastalady.