2021 jyly 26 qańtarda ótken Nur-Sultan qalasy onomastıkalyq komıssııasynyń otyrysynda Nur-Sultan qalalyq máslıhaty turaqty komıssııasynyń kópshilik tyńdaýynda elordanyń keıbir kóshelerine ataý berý jáne qaıta ataý týraly usynystar qaralyp, qoldaý tapqan bolatyn.
Keıin bul usynys respýblıkalyq onomastıkalyq komıssııanyń oń sheshimin alyp, Nur-Sultan qalalyq máslıhaty depýtattarynyń qaraýyna qaıta joldandy. Búgin Nur-Sultan qalasy Máslıhatynyń kezekti 3-shi sessııasynda máslıhat pen qalalyq ákimdiktiń birlesken sheshimi qabyldanyp, Dostyq kóshesinen bastalyp, Dinmuhamed Qonaev kóshesine deıin jalǵasatyn «Qazmedıa ortalyǵy» ǵımaratynyń aldynda ornalasqan kóshege Qazaq radıosynyń ataýy berildi. Kósheniń uzyndyǵy - 560 metr.
Sonymen qosa birlesken sheshimge saı, Almaty aýdany boıynsha jobalyq ataýy №231 kóshege Qazaq radıosynyń dıktory Ánýarbek Baıjanbaevtyń esimi berildi.
«Elorda tórinen kóshe berý ulttyń únjarııasynyń 100 jyldyǵy qarsańynda júzege asyrylyp otyrǵan josparly sharalardyń biri. Bul - radıo tarıhyndaǵy jańa paraq. Jyl sońyna deıin Bas redaksııa 70 jyl aqparat taratqan Almaty qalasynan da Qazaq radıosy kóshesi ashylmaq, tártipke saı tıisti jumystar bastaldy», deıdi «Qazaq radıolary» JShS Bas redaktory - «Qazaq radıosy» radıoarnasynyń dırektory Dýlat Abıbýllaev.
Buǵan deıin, 2021 jylǵy 18 naýryzda Qyzylorda qalasyndaǵy burynǵy «Saıahat 11» kóshesine, Shymkent qalasy «Bozaryq» shaǵyn aýdanyndaǵy kóshelerdiń birine «Qazaq radıosy» ataýy berilgen bolatyn.